Kaleanddarjagi 2022 guolleváriiddikšunmáksu boahtá vuovdimassii 2.11.2021. Guolleváriiddikšunmávssu sáhttá lotnut Meahciráđđehusa vuovdinkanálain dahje R-kioskkain olles riikkas.
Guolleváriiddikšunmávssu sáhttá oastit Meahciráđđehusa neahttagávppis čujuhusas Eraluvat.fi, Eräluvat-heivehusain, bálvalannummiris 020 69 2424, Meahciráđđehusa luondduguovddážiin, R-kioskkain ja earáin soahpamušvuovdinčuoggáin (Eraluvat.fi, suomi). Guolleváriiddikšunmávssu haddi bissu ovddežis, 45 € / kaleandarjahki, 15 € / 7 jándor ja 6 € / 1 jándor.
Guolleváriiddikšunmáksu lea persovnnalaš guolástanlohpi, muhto dan sáhttá lotnut maiddái nuppi olbmui. Oastima oktavuođas galgá almmuhit lobi hálddašeaddji nama, čujuhusa ja riegádanáiggi.
Buohkaide lobi hálddašeddjiide, geaidda lea lodnojuvvon olles kaleandarjagi 2022 guolleváriiddikšunmáksu vuosttamuš vuovdinjándora dahje 2.11.2021 áigge, sáddejuvvo poastta bokte laminerejuvvon guolástankoarta ovdal juovllaid. Lassedieđut guolástankoarttas ja rávvagat dan háhkamii. Loga rávvagiid! (Eraluvat.fi)
− Mii háliidat vuhtiiváldit kampánjjain earenoamážit dálveguolásteddjiid, geat ožžot guolástankoartta Suomu-bláđi mielde easkka cuoŋománus. Oassi guolásteddjiin oidet elektrovnnalaš lohpeduođaštusaid, nuba skeaŋkaháhkamin čázi gierdan koarta illudahttá namalassii daid geat liikojit árbevirolaš guollekoarttas, dadjá Meahciráđđehusa fuođđodoallohoavda Jyrki Tolonen.
Guolleváriiddikšunmávssu galgá guolástanlága mielde máksit, jos lea 18–64-jahkásaš ja bivdá reappáid dahje guolásta muđui go bilkemin, oaggumin dahje sallitvuokkain. Dušše beare guolleváriiddikšunmáksu addá vuoigatvuođa guolástit ovtta stákkuin ja vuokkain čáziin, gos guolásteapmi ii leat ráddjejuvvon. Eanet stákkuin dahje ovttage bivdosiin guolásteapmái dárbbaša lassin čáhceguovllu oamasteaddji lohpi. Lohpi gáibiduvvo maiddái dain geaid eai dárbbaš agi bealis máksit guolleváriiddikšunmávssu.
Guolástettiin mielde galgá leat juogo báberduođaštus dahje elektrovnnalaš duođaštus guolleváriiddikšunmávssu máksimis, ovdamearkka dihtii guolástankoarta, máksinguite dahje Eräluvat-heivehus. Guolásteaddji galgá leat gárvvis čujuhit maiddái su identitehta. Maiddái dat guolásteaddjit, geaid eai agi bealis dárbbaš máksit guolleváriiddikšunmávssu, galget duođaštit agis bearráigeahččái jos dat bivdojuvvo.
Guolleváriiddikšunmávssuid čoaggá Meahciráđđehus, mii dahká ruhtačilgehusa ruđain eana- ja meahccedoalloministeriijai. Eana- ja meahccedoalloministeriija ja EBI-guovddážat mieđihit ruđaid guollečáziid suvdilis ávkkástallama ja dikšuma plánemii ja doaibmabidjamii, guolástanbearráigehččui, guolástanáiggeáji ovddideapmái, guolledoallosuorggi rávvenbálvalusaide, guolledoalloguovlluid doaibmamii ja oamasteaddjibuhtadusaide.
− Astoáiggeguolásteami bivnnutvuođa mielde lassánan guolleváriiddikšunmávssuid boađus oaivvilda buoret vejolašvuođaid guollečáziid dikšumii ja guolásteami ovddideapmái. Mii sávvat máŋgasiid vásihit fiinna luondduvásáhusaid guolásteami olis maiddái čuovvovaš jagi, Jyrki Tolonen dadjá.
Kaleanddarjagi 2021 guolleváriiddikšunmáksu lea vuovdimis 10.12.2021 rádjái, man maŋŋá vássán jahkái sáhttá ain lotnut jándora ja čieža jándora guolleváriiddikšunmávssuid.
Loga lasi eraluvat.fi/kalastonhoitomaksu (suomi)
Lassedieđut:
Olli Urpanen, sierraplánejeaddji, Meahciráđđehus, olli.urpanen@metsa.fi, 020 639 5056
Kirsi Suojoki, sierraplánejeaddji, Meahciráđđehus, kirsi.suojoki@metsa.fi, 040 186 5875
Eana- ja meahccedoalloministeriija
Meahciráđđehus, Fuođđobálvalusat
Ealáhus-, johtalus- ja birasguovddážat
Luondduriggodatguovddáš
Suoma Lustaáiggeguolásteaddjiid Guovddášorganisašuvdna (Suomen Vapaa-ajankalastajien Keskusjärjestö ry)
Guolledoalu Guovddášlihttu (Kalatalouden Keskusliitto)
Suoma sáivačáhceámmátguolásteaddjiid lihttu (Suomen sisävesiammattikalastajien liitto ry)
Suoma Ámmátguolásteaddjilihttu (Suomen Ammattikalastajaliitto ry)