Bieggafápmu

Meahciráđđehus mihttomearrin lea láhčit stáhta guovlluid beaktilis ávkkástallama bieggafámus, goittotge eará eanageavahandárbbuid ja birasárvvuid vuhtii váldimiin. Seammás háliidat iežamet aktiivvalaš doaimmain ovddidit Suoma dálkkádatmihttomeriid ollašuvvama.

Mis lea guhkes vásáhus bieggafámu fidnoovddideamis. Leat leamašan mielde fidnoovddideamen badjel logi proseantta jagi 2019 álggu rájes Supmii huksejuvvon bieggafápmokapasiteahtas. Min hálddašan stáhta eatnamiin leat dál anus 91 bieggafápmolágádusa, maid buvttadan energiija vástida 45 000 šleađggain liggejuvvon sierraviesu šleađggagolahusa. 

Bieggafámu fidnoovddideapmi lea ovttasbargu 

Bieggafámu fidnoovddideapmi lea lávga ovttasbargu gielddaiguin, go gielddain lea Suomas lávvaplánenoktovuoigatvuohta ja sii mearridit dan bokte guovlluideaset geavaheamis. Meahciráđđehus sáhttá dahkat gielddaide lávvaplánenálgagiid, maid vejolaš dohkkehemiid maŋŋá beassat čielggadit mo bieggafámu ja eará eanageavaheami dárbbuid lea vejolaš heivehit oktii. Gárvvistat lávvaplánemis dárbbašuvvon materiála ja máksit bieggafápmolávvabarggus šaddan goluid. 

Bieggafápmoguovllut leat stáhta eatnamiin dábálaččat viehka guhkkin ássamis. Áhpásmuhttinatnu dego meahcásteapmi, murjen ja luonddus lihkadeapmi ja davvin boazodoallu leat dábáleamos eanageavahanhámit. Háleštallat dáiguin eanageavaheaddjiiguin ja kártet árvvolaš guovlluid ja váldit daid vuhtii vejolašvuođaid mielde, go sajuštat fápmolágádusbáikkiid guvlui. Meroštallat eatnamis birasárvvuid, earálágan suodjalanguovlluid, suodjaluvvon ja muđui fuomášan veara lodde- ja šaddošlájaid, deaŧalaš biotohpaid jna. ja garvit váikkuheami daidda. Dát doaimmat plánejuvvojit, ollašuhttojuvvojit ja raporterejuvvojit detáljaid mielde lágasásahuvvon birasváikkuhusaid árvvoštallamis (BVA) ja lávvaplánenproseassain. 

Buot eanageavahanhámit sáhttet joatkašuvvat bieggafápmoguovlluin. Lihkadeapmi lea friddja earret huksenmuttu áigge aktiivvalaš huksenbargoeatnamis. Šleađgastašuvnna guovlu áidojuvvo dorvvolašvuođa dihtii. 

Bieggafámus máksojuvvon giddodatvearru lea máŋgga gildii dat movttiideaddji, mii bealušta bieggafámu huksema. Giddodatvearru sáhttá leat juobe logiid duháhiid euroid jahkásaččat ovtta bieggafápmolágádusa guovdu. Otnábeaivve bieggafápmopárkkaide figgat plánet máŋggaid logiid bieggafápmolágádusaid. Logemat bieggafápmolágádusa addet barggu bieggafápmopárkkas gaskamearálaččat guovtti fuolahanbargái. Huksema áigge bargiid dárbbaša lunddolaččat eanet. 

Gánnáhahtti fitnodatdoaibma 

Bieggafápmu lea otnábeaivve gánnáhahtti fitnodatdoaibma, mii ii dárbbaš doarjagiid. Máŋggaid ođđa bieggafápmopárkkaid šleađga vuvdojuvvo jo ovddalgihtii stuorra šleađggadárbbašeaddjiide guhkesáigge vuovdinsoahpamušaiguin. Ovdamearkan stáhta eatnamiidda huksejuvvon Piiparinmäki bieggafápmopárkka buvttadan šleađggas 60 % vuvdojuvvo teknologiijafitnodat Googlei. 

Lagaš jagiin stáhta eatnamiidda huksejuvvo ođđa bieggafápmu 400 megawátta ovddas ja lagašáigge fidnoovddidanpotensiála lea sulaid 900 megawáhta. Go dát lea huksejuvvon, stáhta eatnamiidda buvttadeapmái plánejuvvon bieggaenergiijai lea investerejuvvon badjel miljárdda euro. Lassin fápmolágádusaid huksema bokte leat addán barggu duháhiid olbmuide ja dahkkon stuorra positiivvalaš váikkuhusaid guovlluekonomiijaide. 

Meahciráđđehusa rollan lea ovddidit fidnuid gárvvisin huksema várás. Dat oaivvilda dan, ahte ohcat bieggafápmobuvttadeapmái heivvolaš guovlluid, čađahan BVA- ja lávvaplánenproseassaid, dahkat fápmolágádusaid sajuštanplána, plánet geainnuid ja šleađgalavttasajiid ja ohcat máŋggalágan dárbbašlaš lobiid, ee. huksenlobiid. Vástidat maiddái dáid doaibmabijuid goluin. Dáid muttuid maŋŋá dahkat fidnui gilvvu ja vuovdit fidnovuoigatvuođaid. Eatnama eaiggátvuohta ii molsašuva, muhto seailu stáhtas ja bearrat das láiggu, mii dahká oasi Meahciráđđehusa bohtosis, mas máksojuvvo vuoitu stáhtii. 

Badjegovas Suoma Hyötytuuli Annankangas bieggafápmopárka. 

Ávkkálaš liŋkkat 

Meahciráđđehus bieggafápmojoavkku oktavuođadieđut 

Pertti Tapio

Bieggafápmooaivámuš

Metsähallitus
Kiinteistökehitys
PL 81 (Veteraanikatu 5)
90101 Oulu

Puh. 0206395302