Ovttasbargu ja oassálastin
Meahciráđđehusa doibmii čuhcet earálágan vuordámušat, maid vásttolaš oktiiheiveheapmi gáibida guoibmevuođa ja ovttas doaibmama viiddis guoibme- ja čanusjoavkkuin.
Meahciráđđehusas ovttasbargohámit molsašuddet ovttas bargamis dieđuid lonohallamii, gávppašeapmái, stivremii ja vuorrováikkuhussii. Dehálaš ovttasbarggu hámit leat ovdamearkan ovttas čanusjoavkkuiguin dahkkon luondduváriidplánen, guimmiiguin dahkkon fidnoovttasbargu ja ráđđádallamat bálgosiiguin.
Meahciráđđehusa čanusjoavko- ja guoibmefierpmádat lea viiddis ja máŋggabealat. Čanusjoavkkut leat buot dat bealit, geain lea gaskavuohta Meahciráđđehusa hálddašan eana- ja čáhceguovlluide. Guoimmit ja čanusjoavkkut leat gaskaneaset hui earáláganat, ja danin maiddái ovttasbarggu vuogit molsašuddet. Oktasaš namaheaddji lea goittotge bissovaš vuorrováikkuhus.
Meahciráđđehusa ráđđádallangottit
Meahciráđđehusas leat eanagottálaš ráđđádallangottit Lappi, Nuortabađaeatnama, Kainuu ja Davvi-Gárjila guovlluin. Ráđđádallangottiid doaibma lea leat veahkkin stáhta guovlluid guoskevaš mearrádusaid dahkamis ja addit Meahciráđđehussii cealkámušaid mearkkašahtti stáhta eana- ja čáhceguovlluid ávkkástallamii gullevaš gažaldagain ja dahkat álgagiid báikkálaš álbmoga sajádaga vuhtii váldimii ja sierra doaimmaid oktiiheiveheapmin. Ráđđádallangottiide leat válljejuvvon olbmot, geat ovddastit máŋggabealagiid eanagottiid olbmuid, vuovdedoalu, ealáhuseallima, birassuodjaleami ja álbmotorganisašuvnnaid
Sámiid ruovttuguovllu gielddaide leat ásahuvvon ráđđádallangottit gielddaid guovdu, main gieđahallat stáhta eana- ja čáhceguovlluid ja daidda gullevaš luondduváriid suvdilis geavaheami ja dikšuma.
Eana- ja meahccedoalloministeriija ásaha buot ráđđádallangottiid lahtut čanusjoavkkuid evttohusaid vuođul. Lahtut válljejuvvojit njealji jagi doaibmaáigodahkii. Dálá doaibmaáigodat bistá jagi 2020 loahpa beallái.