Eará lobit

Lobit-siidduin leat ovdanbuktojuvvon dábáleamos lobit maid sáhttá háhkat Meahciráđđehusas. Lassin leat muhtin dáhpáhusat, maidda dárbbaša Meahciráđđehusas lobi dahje soahpamuša.

Juovlamuorralohpi

Davvi-Suomas Lappi ja Nuortabađaeana–Kainuu guovlluin sáhttá juovllaid áigge oastit juovlamuorralobi mobiilatelefovnnain. Mátta-Suomas dát bálvalus ii leat, dasgo stáhta vuovddit leat Mátta-Suomas gorálaččat unnán ja dat leat bieđgguid. Máŋggat dain leat earenoamášgeavahusas dahje suodjaleami vuolde.

Beatnaga skuvlenlohpi ja beatnaga iskkuslohpi

Meahcástanguvlui sáhttá mieđihit lobi beatnaga skuvlemii dahje meahcástanbeanaiskosa ordnemii 20.8.–29.2. gaskasaš áigge (ealgabeatnagiidda goittotge 20.8.–31.12., mii gullá meahcástanláigohansoahpamuššii).

Earáide beatnagiid hárjeheapmái laktáseaddji doaimmaide sáhttá mieđihit lobi luonddusuodjalanguovllu ráfáiduhttinmearrádusaid ja guovllu eará geavaheami lobálaš rájáid siste. Ovdamearkka dihtii meahcásteapmái láigohuvvon guovlluin meahcástanvuoigatvuođa láigoheaddjis lea vuoigatvuohta mearridit beatnaga doallamis veaiddalasas. Luonddusuodjalanguovlluin beatnaga galgá doallat lávžegeažis.

Fitnodatdoaimma lobit

Jus turismafitnodatdoalli geavaha fitnodatdoaibmamisttis stáhta eatnamiid dahje ráhkadusaid dahje doaibma manná buot vuoigatvuođaid badjel, fitnodatdoalli galgá dahkat Meahciráđđehusain geavahanriektesoahpamuša.

Boazodollui laktásan huksen ja muoraváldin

Boazodoalu, luondduealáhusaid ja nuortalaččaid guoskevaš lágain addojuvvo vuoigatvuohta hukset bohccuid dikšuma várás dihto ráhkadusaid stáhta eatnamiidda. Lobi addá dat virgeoapmahaš, gean hálddus guovlu lea. Nuortalašlága mielde nuortalašguovllus ássán nuortalaččas lea vuoigatvuohta ávkkástallat iežas boaldinmuorradárbbu várás stáhta vuvddiin lean eanamuora dahje goikemuora virgeoapmahačča čujuheami mielde. Davvi-Sámi lobiid sáhttá ohcat Meahciráđđehusa Lappi Luonddubálvalusain.

Luonddusuodjalanguvlui jápmán fuođđoealli háldui váldin

Jos meahcásteami dihtii hávváduvvan ealli manná luonddusuodjalanguvlui ja jápmá dohko, meahcásteaddji oažžu viežžat dan, goittotge nu, ahte suodjalanguovllu earát ráfáiduhttinmearrádusat čuvvojuvvojit. Meahcásteami oktavuođas hávváduvvan ealli oažžu guorrat dušše beare Meahciráđđehusa lobiin ja rávvagiid mielde.

Lohpi luonddusuodjalanguvlui jápmán fuođđoealli háldui váldimii mieđihuvvo njálmmálaččat. Vuosttamužžan áššis galgá almmuhit meahccedárkkisteaddjái.

Girdinfievrruin seaivun

Girdinfievrruid seaivuma gusket seammá prinsihpat go meahccefievrojohtolaga. Girdinfievrru girdileapmái ja seaivumii oažžu áibmojohtolatdoaimmahaga addán mearrádusaid mielde ávkkástallat gaskaboddasaččat rabas čázádatguovllu, guovllu oamasteaddji dahje hálddašeaddji lobige haga. Luonddusuodjalanguovlluin dása goittotge dárbbaša lobi.

Lohpi ohccojuvvo čálalaš lohpeohcamušain álo dalle go jearaldagas lea luonddusuodjalanguovlu dahje go luonddusuodjalanguovllu olggobeale eananbihttái seivojuvvo.