Almmuhus dáhpáhusa ordnemis
Meahciráđđehusa luonddusuodjalanguovlluide dahje lotnolasgeavahanvuvddiide plánejuvvon dáhpáhusain ja meahcis idjadeamis galgá dábálaččat dahkat almmuhusa Meahciráđđehussii.
Dáhpáhusalmmuhusa galgá dahkat buriin áiggiin (millosit unnimustá mánotbaji) ovdal plánejuvvon dáhpáhusa dahje meahcis idjadeami, vai almmuhusa gieđahallamii ja vejolaččat dárbbašuvvon lobi ohcamii ja gieđahallamii báhcá doarvái áigi. Dávjá dáhpáhusa ordnen gáibida nappo almmuhusa lassin Meahciráđđehusa čálalaš lobi.
Dáhpáhusalmmuhus dahkkojuvvo skoviin, mii gávdno dán siiddus vuolleleappos.
Meahciráđđehusa kártabálvalusain sáhttá dárkkistit, leago plánejuvvon dáhpáhusčuozáhat dahje idjadanbáiki stáhta eatnamiin ja leago dat lotnolasgeavahanvuovddis vai luonddusuodjalanguovllus:
Almmuhusa galgá dahkat, go sáhka lea ovdamearkka dihtii meahccegilvvohallan- dahje olgolihkadandáhpáhus, álbmottuvrra ja leairaskuvlla dahje stuorra joavkku meahcis idjadeapmi dahje guhkesáigásaš meahcis idjadeapmi seammá báikkis.
Almmuhusa lea ágga dahkat maiddái álo dalle, jos leat eahpečielggasvuođat das, heivego dáhpáhus dahje meahcis idjadeapmi luonddustis bealis luonddusuodjalanguvlui ja dan ráfáiduhttinmearrádusaide.
Almmuhemiin dáhpáhusain ovddalgihtii sáhttá vealtit badjálasvuođaid ja guovlluid bahkašuvvama.
Almmuhus ii atte vuoigatvuođa spiehkkasit guovllu ráfáiduhttinmearrádusain. Almmuhus ii maiddái okto atte vuoigatvuođa ráhkadusaid huksemii dahje meahccejohtalussii. Dáhpáhusalmmuhusas galgá govvidit ee. vejolaš dárbbuid gaskaboddosaš ráhkadusaid ceggemii.
Soames dáhpáhusain almmuhus lea doarvái iige aitosaš lobi ohcan dárbbašuvvo. Juos almmuhuvvon dáhpáhussii dahje guhkesáigásaš meahcis idjadeapmái dárbbašuvvo goittotge doaibmama luonddu dihtii lohpi dahje dat ii leat guovllu geavaheami dahje ráfáiduhttinmearrádusaid mielde vejolaš, Meahciráđđehus váldá oktavuođa almmuheaddjái.
Lohpi dahje almmuhus ii dárbbašuvvo
- smávva álbmotdáhpáhusa ordnemii
- govvemii, jos dat ii dagat vahága dahje hehttehusa eallišlájaide ja šaddodahkii ja jos das ii geavahuvvo čiegusskája (spiehkastahkan geahppa, tealtálágan čiegusskájat)
- oanehisáigásaš meahcis idjadeapmái čujuhuvvon guovlluin dahje eará buohkaid vuoigatvuođain dáhpáhuvvan doaibmamii.
Galgá goittotge fuomášit, ahte máŋggain luonddusuodjalanguovlluin ovdamearkka dihtii meahcis idjadeapmi sáhttá leat gildojuvvon dahje ráddjejuvvon guovllu vuođđudanásahusaid dahje ortnetnjuolggadusa vuođul.
Guovlluin galgá čuovvut ruskkahis vánddardeami prinsihpa. Dáhpáhusordnejeaddji doallá dáhpáhusbáikki ja dan lagašbirrasa čorgadin dáhpáhusa áigge sihke doalvu ruskkaid ja eará bázahusaid iežas goasttádusain eret dáhpáhusbáikkis dalánaga dáhpáhusa maŋŋá.