Suoma suodjalanguovllut oassi riikkaidgaskasaš fierpmádagas

Stáhta eatnamiidda vuođđuduvvon Suoma luonddusuodjalanguovllut, meahcceguovllut ja vánddardanguovllut leat oassi oppa máilmmi suodjalanguovlluid fierpmádagas. Measta buot dát guovllut min riikkas gullet Eurohpá uniovnna Natura 2000 – fierpmádahkii.

Suoma suodjalanguovlluid fierpmádagas lea njuolggadusain jo vuođđuduvvon guovlluid lassin maiddái luonddusuodjalanprográmmaide gullevaš, vel vuođđudankeahtes guovllut. Dát stáhtaráđi prinsihppamearrádusain suodjaleapmái várrejuvvon guovllut skáhppojuvvojit stáhtii oastimiin ja eatnama lonuhemiin. Maiddái prográmmaguovllut gullet Natura 2000 -fierpmádahkii. Suodjalanprográmmaguovlluin dahkkojit birasministeriija gárvvistan lágain ja ásahusain luonddusuodjalanguovllut. Measta visot stáhta suodjalanguovlluid dikšu Meahciráđđehusa Luonddubálvalusat. Maiddái priváhta eatnamiidda sáhttá vuođđudit ođđa suodjalanguovlluid.

Viiddis fierpmádat dorvvasta máŋggahámatvuođa

Luonddusuodjaleapmi ovddiduvvo soahpamušain ja ovttasbargguin badjel suodjalanguovlluid ja stáhtaid rájáid. Máŋggain fidnuin leat mielde virgeoapmahaččat, dutkit ja searvvit ja priváhta olbmot.

Luonddu máŋggahámatvuođa suodjaleapmi ja suvdilis ávkkástallama strategiija “Luonddu beales – olbmo buorrin” laktása maiddái riikkaidgaskasaš mihttomeriide. Vuođđun leat maiddái viiddis našuvnnalaš čielggadusat Suoma luonddu máŋggahámatvuođa dilis ja dasa váikkuhan áittadahkkiin.

Suodjalanguovlluid fierpmádagaid vehkiin figgat dorvvastit luonddu máŋggahámatvuođa: eallinbirrasiid ja šlájaid valljivuođa. Ovddidemiin ja dikšumiin fierpmádaga čuozáhagaid dorvvastat áittavullosaš šlájaid ja luonddutiippaid seailuma ja ráhkkanat dálkkádatrievdamii. Fierpmádaga bokte šlájat sáhttet leavvat dahje sirdašuvvat ovdamearkan máddelis davás guvlui.

Suodjalanguovlluid fierpmádat dievasmahtto stáhta eatnamiid lotnolasgeavahanvuvddiid guovlluekologalaš plánemiin. Suodjalanguovlluid ja lotnolasgeavahanvuvddiid árvvolaš eallinbirrasiid ovttastan ekologalaš manahagat veahkehit ee. áittavullosaš šlájaid sirdásit eallinbirrasis nubbái.

Lassidieđut: