Luánduriggodâhvuávám stivree Meccihaldâttâs tooimâid sämmilij päikkikuávlust iivij 2022–2027. Luánduriggodâhvuávám mittoo já stivree Meccihaldâttâs kuávlu luánduriggoduvâin ávhástâlmist. Vuávámân uásálist vijđes juávkku sämmilij päikkikuávlu ässeid já Meccihaldâttâs čonâsjuávhuid.

Vuávámkuávlu luávdá staatâ eennâm- já čäcikuávluid Iänuduvâst, Ucjuuvâst já Anarist sehe Laapi palgâs kuávlu Suáđikylást. Vuávámkuávlu luávdá 91 % oles kuávlu vijđoduvâst, mii uáivild puohnâssân suullân 2,9 miljovn hehtaarid. Oovdiš luánduriggodâhvuávám Paje-Laapin tohhui ive 2012 já tot lii vyeimist ive 2021 loopâ räi.

Vuávámist árvuštâleh staatâ enâmij já čaasij tááláá tile sehe kiävtu já luánduriggoduvâi uásild. Lasseen árvuštâleh, maht Meccihaldâttâs vaigutteijeevuotâ lii ovdánâm moonnâm vuávámpaajeest já maht tot ovdán tááláin eennâmkevttimčuávdusijguin.

Ulmen lii heiviittiđ oohtân staatâ-omâsteijee Meccihaldâttâsân pieijâm mittomeerijd páihálij mittomerijguin. Vuávámkuávlu lii sämmilij päikkikuávlust já eromâš puásuituálukuávlust. Meccihaldâttâslaahâ kenigit turviđ sämikulttuur eellimiävtuid, já luánduriggodâhvuávám lii täst kuávdáš riäidu.

Luánduriggodâhvuávámist annoo Meccihaldâttâs, sämitige já nuorttâlij sijdâčuákkim oovtâst rähtim Akwé: Kon –toimâmalli. Toimâmalli iššeed tubdâđ sämikulttuur siäilum tááhust tehâlijd aašijd sehe reagistiđ toid.

Proojeekt ääigi ráđádâlleh kuávlu jyehi vyevdipalgâsijn vâi heiviitteh vyevdituálu oohtân eres eennâmkevttimáin. Täi ráđádâlmijn viggeh kavnâđ uđđâlágán vuovijd sooppâđ vuovdij kieđâvušmist. Vuovdij kiävtun lahtojeijee rekinistmeh já mittomeh tahhojeh jyehi palgâs puotâ sierâ.

Ohtsâšpargojuávkku lii proojeekt kuávdáš ohtsâšvuávám pargoniävu, já Meccihaldâttâs lii povdim toos kuávlu kuávdáš čonâsjuávhuid. Čonâsjuávhoid láá vuolgâttum pivduuh nomâttiđ juávkun jesânijd. Ohtsâšpargojuávkku čokkân vuávám ääigi kuulmâ pargopááján suogârdâllâđ luánduriggoduvâi tipšom já kevttim mittomeerijd já máhđulâšvuođâid sehe rähtiđ linnjáid vuávámkuávlu toimáid.

Vuávám ääigi uárnejuvvojeh meiddei teemajuávhui pargopáájáh, main suogârdellih luánduriggodâhvuávámân lahtojeijee aašijd miäruštâllum teema ooleest. Ohtsâšpargo- já teemajuávhui áigumuš lii finniđ vuávámân mield äššitubdâmuš jieškote-uvlágán čujosjuávhuin. Tai juávhui lasseen ulmen lii rähtiđ puohháid ávus nettivuáđusii kárttákoijâdâllâm sehe orniđ pargopáájá kuávlu nuoráid, mast sij uážžuh muštâliđ sijjân tehálijn aašijn.

Vuávám kalga leđe vaalmâš ive 2021 loopâst.

Lasetiäđuid luánduriggodâhvuávámist sämmilij päikkikuávlust adeleh:

Proojeekthovdâ Olli Lipponen, p. 0206 39 6520, olli.lipponen@metsa.fi
Stivrimjuávhu saavâjođetteijee Jyrki Tolonen, p. 0206 39 7640, jyrki.tolonen@metsa.fi

Päivitetty viimeksi 11.9.2020