Meahciráđđehus lea ožžon gárvvisin evttohusa Bievrrašjávrri meahcceguovllu dikšun- ja geavahanplánas ja bivdá máhcahaga 4.6.2026 rádjái. Gulaskuddamis buohkain beroštuvvan beliin lea vejolašvuohta kommenteret evttohusa sisdoalu.
Dikšun- ja geavahanplána stivre Eanodaga gielddas lean Bievrrašjávrri meahcceguovllu dikšuma ja geavaheami ovddideami ja heiveha oktii guovllu geavahandárbbuid čuovvovaš 10–15 jagi áigge.
Proseassa áigge ovttasbargojoavkku čoahkkimiin guovllu guovddáš čanusjoavkkut leat váldojuvvon mielde ja nammaduvvon Akwé: Kon -bargojoavkku bokte lea sihkkaraston sápmelaččaid oassálastin plána gárvvisteami sierra muttuide ja váikkuhusaid árvvoštallamii, mat čuhcet sámekultuvrii. Meahciráđđehus sávvá čanusjoavkkuin ja buot áššis beroštuvvan beliin cealkámušaid dahje kommeanttaid 4.6.2026 rádjái.
Dikšun ja geavahanplána meroštallá, mo guovllu bajásdoallat suvdilit
Dikšuma ja geavaheami mihttomearrin lea dorvvastit guovllu meahcceláganvuođa, sámekultuvrra ja luondduealáhusaid, luonddutiippaid ja šlájaid vuogas suodjalandási sihke seailluhit geavaheami seammaláganin báikkálaškultuvrra ja boazodoalu dáfus.
“Plánain figgat dorvvastit guovllu suvdilis geavaheami ja áhpásmuhttingeavaheami dálá meahcceluottaiguin ja bálvalanrusttegiiguin. Beaivvádahttima oktavuođas linnjejuvvojit earret eará, mo meahcceguovllu juhkkojuvvojit avádagaide ja makkárat leat guovllu earálágan geavahanhámit”, geassá oktii eanageavaheami sierraáššedovdi Essi Moilanen Meahciráđđehusa Luonddubálvalusain.
Guovllu dálá dikšun- ja geavahanplána lea jagis 2001. Beaivvádahttima oktavuođas Bievrrašvuomi ja Sárávuomi-Guoskkesábi jekkiidsuodjalanguovllut leat guđđojuvvon dikšun- ja geavahanplána olggobeallái meahcceguovllu ja luonddusuodjalanguovlluid guoskevaš earálágan njuolggadusaid dihtii. Boares plána heaittihuvvo, ja ođđa plána guoskkaha dušše Bievrrašjávrri meahcceguovllu.
Dehálamos lea dorvvastit guovllu guovddáš árvvuid ja stivret suvdilis geavaheami
Dikšun- ja geavahanplána veahkeha dorvvastit buorebut guovllu guovddáš árvvuid ja stivret guovllu geavaheami suvdilis ja ávaštalli vugiin.
Plánas leat váldojuvvon vuhtii čanusjoavkkuid oainnut earret eará boazodoalu, sámekultuvrra, luondduealáhusaid, meahcce- ja guollebivddu dáfus.
Evttohusas buktojuvvo ovdan earret eará, ahte meahcceguovllu guovddáš vuolggasajiide Galbmagáldu ja Neakkela guvlui dolvojuvvojit galledeaddjirehkenastit, maiguin čuovvut sesoŋŋaid áigásaš molsašuddama ja áhpásmuhttingeavahusa deaddaga guovllus.
Dán lassin beanaráidduide eai mieđihuvvo fitnodatdoaibmamii eananoamasteaddji mieđiheamit. Juos guovllus beroštuvvat eanet meahccejohtalusa oasis, sáhttá Meahciráđđehus vihkkedallat dihtomeriid safári- ja reahkafievrridanfitnodagaid mearrái.
Linnjemiid mihttomearrin lea dorvvastit Bievrrašjávrri meahccelágan luonddu, áidalasvuođa, luondduárvvuid ja sáme- ja báikkálaškultuvrra eavttuid. Linnjemiiguin ávaštallat, ahte guovllu geavaheapmi ii šatta dássái mii ii leat suvdilis.
Meahciráđđehus bivdá dikšun- ja geavahanplána evttohusas cealkámušaid earret eará gielddas, virgeoapmahaččain ja meahcceguovllu lahka doaibman guovddáš fitnodagain. Maiddái priváhta olbmot sáhttet addit máhcahaga dikšun- ja geavahanplánas. Dan sáhttá dahkat čálalaš cealkámušain Meahciráđđehusa registrerenkantuvrii.
Bivdit sáddet cealkámušaid ja oainnuid šleađgapoastta bokte čujuhussii kirjaamo(at)metsa.fi.
Dikšun- ja geavahanplána evttohusa sáhttá oaidnit Meahciráđđehusa metsa.fi-siidduin čujuhusas https://www.metsa.fi/poyrisjarvihks.
Cealkámušgulaskuddama maŋŋá dikšun- ja geavahanplánii dahkkojuvvojit vejolaš nuppástusat ja ráđđádallat boazodoallolága ja sámediggelága mielde. Dikšun- ja geavahanplánii laktojuvvo čoahkkáigeassu dikšun- ja geavahanplána guoskkahahtti máhcahagain, daid vástádusain ja evttohusaid vuođul dahkkojuvvon nuppástusain. Plána nanne birasministeriija.
Lassedieđut
- Essi Moilanen, eanageavaheami sierraáššedovdi, Meahciráđđehus, Luonddubálvalusat, tel. 040 554 3905, ovdanamma.sohkanamma@metsa.fi
- Bievrrašjávrri meahcceguovllu dikšuma ja geavaheami plánen -neahttasiidu
- Bievrrašjávrri meahcceguovlu Luontoon.fi -siiddus