Mávssuvuollásaš parkerema geahččaleapmi álgá Sipoonkorpi álbmotmeahcis oaivegávpotguovllus, Koli álbmotmeahcis Davvi-Gárjilis, Riisitunturi álbmotmeahcis, Gilonanoaivvis Urho Kekkonen álbmotmeahcis ja Korouoma suodjalanguovllus Lappis čakčamánu álggus. Parkerenmávssuin boahtán sisaboađut mannet vánddardančuozáhagaid bajásdollui. Mihttomearrin lea gokčat goluid, mat bohtet parkerenguovlluid, geainnuid ja vánddardanráhkadusaid bajásdoallamis.
Parkeren máksá euro diimmu ovddas dahje eanemustá vihtta euro jándoris geahččaleamis mielde lean vánddardančuozáhagaid čuovvovaš parkerenguovlluin:
- Sipoonkorpi álbmotmeahcci: Tasakallio guokte parkerensaji (invadovddaldagain parkeren seailu nuvttá, bálddas álgá Storträsk easttahis máđidja) ja Kalkkiuunintie guokte parkerensaji. Sipoonkorpi earát parkerensajit seilot doaisttážii nuvttá parkeremis.
- Koli álbmotmeahcci: Ylä-Kolintie P1-, P2- ja P3-parkerensajit. (P1-parkerensajis parkeren lihkadaneasttalaš parkerendovddaldagain lea nuvttá). Hotealla Kolis idjadeaddjiide parkeren lea ain nuvttá. Koli earát parkerensajit seilot doaisttážii nuvttá parkeremis.
- Urho Kekkonen álbmotmeahcci: Gilonanoaivvi Meahciráđđehusa parkerensadji. Álbmotmeahci earát parkerensajit seilot doaisttážii nuvttá.
- Riisitunturi álbmotmeahci parkerensadji.
- Korouoma Saukkovaara parkerensadji. Koivuköngäs parkerensadji seailu nuvttá.
Parkeren lea mávssuvuollásaš dmu 9-18, parkerema vuosttas 30 minuhta lea nuvttá. Parkeren máksojuvvo Easypark-mobiilaapplikašuvnnain. Maŋŋelis čakčat lea vejolaččat boahtimin maiddái teakstadiehtomávssu vejolašvuohta. Geahččaleami áigge máksin sáhttá viidut maiddái eará mobiilaparkerenbálvalusaide.
Mávssuvuollásaš parkerema geahččaleapmi joatkašuvvá jagi 2027 giđa rádjai. Parkeren bearráigehččojuvvo ovttas Parkkipate Oy fitnodagain.
– Dilis, mas Meahciráđđehusa vánddardančuozáhagaid bajásdollui stáhta bušeahtas boahtán ruđat geahppánit, mii fertet ohcat ođđa vugiid goluid gokčamii. Almmolaš ságastallamis boahtá dávjá ovdan, ahte máŋggat livčče gárvásat máksit álbmotmehciin fállojuvvon bálvalusaid ovddas. Čuovvutge dál beroštumiin, makkár vásáhusat parkerenmávssuid geahččaleamis ožžojuvvojit. Álbmotmehciid máđijat, bosihansajit ja earát bálvalusat seilot nuvttá anus maiddái boahttevuođas, áššehasvuođahoavda Elias Haapakorva Meahciráđđehusa Luonddubálvalusain muitala.
Lassedieđut mediai:
- Áššehasvuođahoavda Elias Haapakorva, t. 040 183 1214