Birasministeriija lea nannen Anáris lean Váhčira meahcceguovllu dikšun- ja geavahanplána, mainna linnjet guovllu ávkkástallama ja doaimmaid, mat doppe dahkkojuvvojit. Meahciráđđehusa gárvvistan plánain heivehat oktii guovllu sierra geavahanhámiid meahccelága mielde.
Váhčira meahcceguovlu Anárjávrri nuortageažis lea dehálaš sámekultuvrii ja boazodollui ja maiddái dehálaš bivdovánddardan- ja bivdoguovlu. Dikšun- ja geavahanplána linnjemiid mielde Váhčiris seailluhat dálá bálvalanrusttegiid. Guovllus leat vihtta stobu vánddardeaddjiide sihke moadde goavddi, goađit ja dolastallansajit. Máttanuortin johtá moattelogi kilomehtera guhkkosaš Piilola geassevánddardanmáđidja. Maiddái dálá skohterluottat seailluhuvvojit. Seamma maiddái guovllu meahcástan- ja guolástanordnemat seilot dego ovdal.
Plána stivre lobiid mieđiheami
Plánas linnjejit maiddái geavahanrivttiid luobadeamis doarjjabáikkiid várás ee. čujuhemiin Váhčira badjosiidda guovllu, gosa eai mieđit ođđa doarjjabáikkiid. Turismafitnodagaid dárbbašan máđijain soahpat ráđđádallamiin bálgosiiguin ja turismafitnodagaiguin. Beanageasusdoibmii eai mieđit lobiid meahcceguvlui, muhto juohkeolbmorivttiin dáhpáhuvvan beanagessosiin lihkadeapmái ii plánain sáhte váikkuhit.
Váhčir lea viđádin stuorimus meahcceguovlu
Váhčira meahcceguvlui gullet Anárjávrri nuortaosiid čáppa gáttit ja eatnatlohkosaš sullot sihke viiddis jávrri davvenuortta beale beahcevuvddiid, jekkiid ja čáziid mosaihkka. Lappis leat 12 meahcceguovllu, mat leat vuođđuduvvon guovlluid meahccelágášvuođa seailluheami, sámekultuvrra ja luondduealáhusaid dorvvasteami várás sihke luonddu máŋggabealat ávkkástallama ja dan gáibádusaid ovddideapmin.
Meahccelága mielde Meahciráđđehus galgá meahcceguovlluin gárvvistit dikšun- ja geavahanplána, man birasministeriija nanne. Birasministeriija geahččá, ahte plána nannen čuovvu meahccelága mihttomeriid. Birasministeriija deattuha plána ollašuhttimis bearráigeahču ja váikkuhusaid árvvoštallama ja daid vuođul dahkkojuvvon doaimmaid mearkkašumi sámekultuvrra ja luondduealáhusaid hárjeheami eavttuid dorvvasteapmin. Lassin birasministeriija gávnnaha earret eará, ahte sámekultuvrra dorvvasteapmin lea dárbu guorahallat Váhčira meahcceguovllu ráddjema meahccelága ođasmahttimis jáhkkimis lagašáiggiin.
Viiddis oassálastin plánemii
Plánas leamašan mielde viiddis, guovllu guovddáš čanusjoavkkuin čohkkejuvvon ovttasbargojoavku. Ovttasbargojoavkkus leamašan mielde earret eará gieldda, luonddusuodjaleami, meahcástan- ja guolástanoassebeliid ja boazodoalu ovddasteaddjit.
Váhčira meahcceguovlu gullá ollásit sámiid ruovttuguvlui ja measta ollásit nuortalašlágas oaivvilduvvon nuortalašguvlui. Plána lea gárvvistuvvon ovttasbarggus maiddái Sámedikki ja Nuortalaččaid siidačoahkkima nammadan Akwé: Kon -bargojoavkkuin.
Birasministeriija mearrádusas sáhttá váidit Davvi-Suoma hálddahusriektái.
Lassidieđut
Spesiálaplánejeaddji Liinu Törvi, telefon 040 7541512, šleađgapoasta liinu.torvi(at)metsa.fi
Aluepäällikkö Elina Stolt (27.8.), telefon 040 039 8983, šleađgapoasta elina.stolt@metsa.fi