Meahccejohtaluslobit stáhta eatnamiidda
Meahccejohtalussii dárbbašuvvo álo eananeaiggáda lohpi. Stáhtaeatnamiidda lobi mieđiha Meahciráđđehus. Meahccejohtalus mearkkaša mohtorfievrruid johtima meahcis. Meahcit leat guovllut, mat eai leat mohtorfievrruide oaivvilduvvon geainnut dahje virggálaš mohtorgielkámáđiijat.
Muohtaáigodaga meahccejohtaluslobit
Muohtaáigodaga mohtorgielkálobit leat luoddalobit, meahccejohtaluslobit luottaid olggobeallái ja mátkeealáhusdoaimma lobit.
Luoddalobit
Luoddalobiin oažžu vuodjit mohtorgielkkáin Meahciráđđehusa merken ja rahpan gielkáluottain olles riikkas. Luoddalobi sáhttá oastit njuolga, almmá ohcamuša gieđahallama haga Eraluvat.fi-bálvalusas. Luoddalohpi iežas ruovttugildii lea nuvttá.
- Kárttát ja dieđut luottaid rahpamis gávdnojit Mohtorgielkámáđiijat ja -luottat -siiddus (eraluvat.fi, suomagillii)
- Luoddalobi sáhttá oastit Eraluvat.fi-bálvalusas (suomagillii)
Meahccejohtaluslobit luottaid olggobeallái
Meahccejohtalussii luottaid olggobeallái sáhttá mieđihuvvot lohpi ohcamuša vuođul. Guhtege ohcamuš vihkkedallojuvvo sierra. Dábálamos ákkat leat johtin dahje fuolahusvuodjin iežas dahje láigogiddodahkii, guollebivdu, guollečáziid dikšun ja dáhpáhusaid fuolahusvuodjimat. Meahccejohtaluslohpi iežas ruovttugildii lea nuvttá.
Safárit ja reahkasáhtut
Juos leat safárifitnodatdoalli dahje ordnet reahkasáhtuid Meahciráđđehusa hálddašan stáhta eatnamiin, don galggat soahpat Meahciráđđehusain doaimmas ja dan oktavuođas geavahuvvon mohtorgielkáluottain ovddalgihtii.
Safáridoaimma várás fitnodat dárbbaša Meahciráđđehusa miehtama sohppojuvvon luotta geavaheapmái ja guđege safárii meahccejohtaluslobi, man oaččut dahkamiin safári-almmuhusa Eräluvat.fi-bálvalusas.
Reahkasáhtuide fitnodat dárbbaša Meahciráđđehusa miehtama sohppojuvvon luotta geavaheapmái ja meahccejohtaluslobi mohtorgielkká vuoddjái.
Bievlaáigodaga meahccejohtaluslobit
Bievlan meahccejohtalus lea váldoáššis gildojuvvon rašes luonddu guorbama dihtii, daningo luottat vuhttojit jagiid, juoba jahkelogiid. Geasset meahccejohtalussii sáhttet mieđihit lobi ohcamušaid vuođul erenomáš ákkaid dihtii. Ákkat sáhttet leat meahccebivdu ja meahcivaljidikšun, giddodahkii dahje gollerogganbáikái johtin ja báikkálaš luondduealáhushárjeheaddjiid vealtameahttun vuodjin.
Meahccejohtalus suodjalanguovlluin
Suodjalanguovlluide meahccejohtaluslobit eai dávjjimusat mieđihuvvo. Spiehkastagat leat virgeoapmahašdoaibma, boazodoallu davvin ja iešguđetlágan geainnuid, dámpajohtolagaid ja linjjáid bajásdoallan.
Fuolahus- ja eará vealtameahttun johtolaga figget ráddjet dálvet garvin dihtii meahccevahágiid. Boazodoalu oktavuođas lea lobálaš johtit maid geasset njeljoriin dahje guđoriin. Meahccebivdoguovlluin sáhttá addit lobi ovdamearkka dihtii báhččojuvvon fuođđoealli viežžmii mohtorgielkkáin, njeljoriin dahje guđoriin. Maiddái mátke- ja luondduealáhusa fuolahussáhtut sáhttet leat lobálaččat dihto ráddjehusaiguin.
Astoáigge mohtorgielkávuodjin ii leat lobálaš suodjalanguovlluin. Spiehkastahkan lea davimus Lappi, gos meahcceguovlluid viidodaga dihtii mohtorgielkáluottat sáhtet mannat suodjalanguovlluid bokte.