Tän ǩieʹssen Meäʹcchalltõõzz vuäʹmm da luâđlaid mieʹcci inventõʹstti tuejjeeškuäʹtte Jeänõõǥǥ, Uʹccjooǥǥ da Aanar kooʹddi vuuʹdest de Suäʹđjel taʹvvpeäʹlnn inventâsttmõõžž. Inventâʹsttemnalla liâ vuʹvddmeäʹcc de čeäʹrrsueʹǩǩrååđ.
Säʹmmlai dommvuuʹd inventâsttmõʹšše liâ paʹlǩǩuum puk veeʹzz 30 meäʹccämmatneʹǩǩed, kook alttee meäʹcctuâj ǩieʹssmannu aalǥâst. Inventâʹsttem vuʹvdd siiʹsǩad meäʹcctääll âânnmõõžžâst åårrai vuuʹdid de luâtt-täällvuuʹdid.
Inventõʹstti arvvlâʹstte luâđast vueiʹtlvaid suejjeemkriteeʹrid tiuddi mieʹccid. Meäʹccmettummšest seʹlvvte muõri ââʹjj de ceägg- da mäddläähhjam-muõri veiddsõsvuõđid. Lââʹssen ǩeʹrjjee ouddmiârkkân ceäggad läähhjam da sueʹrvi õlmmnemvuõđid. Arvvlõõđeeʹn åʹcce še ääiʹjben meäʹccǩiõttʼtõõllâm ǩiõʹjid mâʹt-a čuõldid, vuäjaid da vuejjamǩeäinaid. Inventõʹstti tuejjeem taʹrǩstõõllmõõžž vuâđđee valdiasuåvtõõzz priimmâm vuäʹmm da luâđlaž mieʹcci meersaid kriteeʹrid.
“Säʹmmlai dommvuuʹdest pâʹjjel 90 proseeʹnt liâ valdia vaaldšem mädd- da čääʹccvuuʹd. Mäddvuuʹdin čiččâm proseeʹnt liâ meäʹcctääll tåimmam pirrsest åårrai määŋgââʹnnem-mieʹcc, leʹbe väʹlddvueʹzzest vuuʹdest jiâ harjjtââtt meäʹcctääll”, peäggat Meäʹcchalltõs Metsätalous Oy meäʹccââʹnnem- da plaaneemjååʹđteei Hannu Lehtonen.
Luâtt-täällvuuʹd sâʹjjee Pâʹjj-Lappi väʹlddčuõkkui kuâŋŋsest čuâkksi da poostaijânnam- leʹbe suejjeemvuuʹdi kõõskast. Luâtt-täällvuuʹd liâ meäʹcctäällâânnmõõžž åålǥpeäʹlnn da tõi väʹlddâânnmõõžž liâ puäʒʒhåiddmõš, jeeʹres luâttjieʹllemvueʹjj, meäccjummuš da kueʹllšeellmõš.
“Luâtt-täällvuuʹdi veeidasvuõđ, väʹǯǯlõs jeällmõõžži da vaiggâd vuällamvuõđ diõtt tõi inventâsttmõõžžâst pâjjne kookkaskartteem-mõõntõõllmõõžž”, mäddââʹnnemšurr Perttu Finne ceälkk.
Luâtt-täällvuuʹd liâ vääžnai pääiklažõhttõõzzid de jânnampeälštem vueiʹnnemkuuʹlmest.
“Tõʹnt väʹlddčuõkkui kuhttu peäʹlnn rajjee õõut ǩilomettar kååbda vuuʹdid, koid kueʹđđe inventâsttmõõžž da suejjeemeʹtǩǩõõzzi åålǥpeälla. Tät hiâlpad ouddmiârkkân pääiklaž infrahaʹŋǩǩõõzzi čõõđtummuš, kuvddlõõzzi ooudâsviikkmõõžž de jânnampeälštem taarbid”, Finne ceälkk.
Investâsttmõõžžâst lij suåppum mädd- da meäʹcctäällministeria ǩieʹssem õhttsažtuâjjäʹrttlest, koʹst liâ leämmaš eeʹttiǩ mädd- da meäʹcctäällministeriast, pirrõsministeriast, Meäʹcchalltõõzzâst da Sàpmi-äʹrttlest.
Lââʹssteâđ
Meäʹcchalltõs Metsätalous oy, meäʹccââʹnnem- da plaaneemjååʹđteei Hannu Lehtonen, teʹl 040-5836983
Meäʹcchalltõs Ǩiiddõsoouʹdummuš, Mäddââʹnnemšurr Perttu Finne, perttu.finne@metsa.fi, teʹl. 040 508 8991