Suopmelaččat movttiidedje jagi 2020 guolástit ja meahcástit stáhta guovlluin measta olahuslaš olu. Meahcce- ja guollebivdiid mátkkošteapmi ruovtturiikkas attii barggu árvvu mielde 288 olmmošbargojagi veardde.
Meahciráđđehus vuvddii guolástanlobiid 117 000 stuhka dahjege viđádasa eanet go ovddit jagi. Meahcástanlobiid vuvde 85 000 stuhka, mas lasáhus lei 16 proseantta. Spiehkastatdiliid váikkuhus fuođđoberoštupmái oidnogođii seammás cuoŋománus: meahccebivddu áigodatlobiid ohce Meahciráđđehusas eanet go goassige ovdal.
Máhcahaga vuođul meahcásteaddjit ja guolásteaddjit ledje viehka duđavaččat stáhta guovlluid fuođđočuozáhagaide, lobi oažžumii ja bálvalussii. Meahcásteaddjit adde árvosátnin 3,78 ja guolásteaddjit 3,74, go skála lei ovttas vihttii.
Buot guolle- ja meahccebivdu ii oidno Meahciráđđehusa statistihkain, go ovdamearkan rudneoaggun lea stuorámus oasis čáhceguovlluin nuvttá. Lassin davvisuopmelaččat sáhttet meahcástit nuvttá ruovttugielddas stáhta guovlluin.
Váikkuhus 54,4 miljon euro
Guolle- ja meahccebivdiid ruhtageavaheami váikkuhus sierra guovlluid ekonomiijaide lei mannan jagi oktiibuot 54,4 miljon euro, mii mearkkaša barggus 288 olmmošbargojagi ovddas. Meahcce- ja guollebivdu buvttii eanemus barggu Lappii (165 obj), Kainuui (60 obj), Nuortabađaeatnamii (24 obj) ja Davvi-Gárjilii (20 obj).
Meahciráđđehusa čielggadeami mielde meahcce- ja guollebivdit buktet barggu eandalii idjadanfitnodagaide, bođugávpái ja restoráŋŋaide.
”Min doaibman lea ordnet fuođđobivddu suvdilit, ahte ávki das boahtá guovllu fitnodagaide. Dás leat lihkostuvvan” fuođđodoallohoavda Jukka Bisi dadjá. “Fuođđobivddus ii lassáneapmi leat dat deháleamos mihttomearri, muhto baicce guolle- ja meahccebivddu suvdilisvuohta ja dorvvolašvuohta”.
Ovdamearkan meahcástančuozáhagaide ásahuvvo álo lohpedihtomearri varas fuođđorehkenastimiid vuođul. Bivnnuheamos guovlluin lobit nohket álkit. Mannan jagi meahccebivdit gávdne goittotge ođđa guovlluid, maidda lohpevuovdin lei árabut unnán.
Meahciráđđehusas leat 124 smávvafuođđoguovllu meahccebivdiide ja 54 stággolohpeguovllu guollebivdiide. Lassin vuovdit lobiid earret eará stuorrafuođu bivdui ja bivddusguollebivdui. Gávppálaš guollebivdit sáhttet ohcat lobiid ealáhusas hárjeheapmái.
Lassedieđut:
Mikko Malin (guolástanlobit)
mikko.malin@metsa.fi, tel. 0206 39 4637
Ahti Putaala (meahcástanlobit)
ahti.putaala@metsa.fi, tel. 0206 39 6619
Mikko Rautiainen (guovlluekonomiijaváikkuhusat)
mikko.rautiainen@metsa.fi, tel. 0206 39 6001