Sápmelaččaid ruovttuguovllu luondduriggodatplána lea dál oažžumis julkaisut.metsa.fi -siidduin. Luondduriggodatplána lea lohkamis suoma- ja davvisámegillii. Anárašgielat ja nuortalašgielat veršuvnnat lasihuvvojit siidduide maŋŋelis.
Sápmelaččaid ruovttuguovllu luondduriggodatplána stivre Meahciráđđehusa doaimma sápmelaččaid ruovttuguovllus jagiin 2022-2027. Dál almmustahtton luondduriggodatplána lea anus jagi 2027 rádjai, man maŋŋá das dahkko fas ođđa veršuvdna.
Ođđa luondduriggodatplána lea dahkkon oktasašplánema vugiiguin. Linnjemiid leat hábmen guovllu ja eanagotti doaibmiiguin čohkkejuvvon ovttasbargojoavkkuin ja Sámedikki nammadan Akvé: Kon -bargojoavkkuin. Prošeavttas leamašan maiddái máŋga temájoavkku, main leat vuddjon dárkileappot earret eará turismma, boazodoalu, gielddaid ja guovllu nuoraid sávaldagaide ja dárbbuide.
Sámedikki ságajođiheaddji Tuomas Aslak Juuso kommentere Sápmelaččaid ruovttuguovllu gárvvistanproseassa čuovvovaččat:
“Sámedikki ja Meahciráđđehusa ságastallamat Sápmelaččaid ruovttuguovllu luondduriggodatplána gárvvisteamis leat ovdánan buori vuoiŋŋas. Lea fiinnis, ahte sámekultuvrii čuohcán váikkuhusaid árvvoštallama várás vuođđuduvvui proseassa álggus Akwé: Kon -bargojoavku min ovttas ráđđádallan doaibmamálle vuođul.
Sámedikki ja Meahciráđđehusa gaskka gevvojuvvon ráđđádallamiin oktasaš ipmárdus gávdnui máŋggaid mearkkašahtti áššiid bokte ja soabaimet maiddái doaibmabijuin, maid Meahciráđđehusa jođihemiin ovdánahttigoahtit. Dieđusge beavddi ala báhce maiddái gažaldagat, main eat lihkostuvvan beassat oktasaš oidnui, ovdamearkan Lappi bálgosa guovllus ássán sápmelaččaid rivttiid nannema, ja málbmaohcama ja ruvkedoaimma sihke meahcástanlobiid ja dihtomeriide gullevaš girjemiid bokte.”
94 sierra doaibmabiju stivremin Meahciráđđehusa doaimma
Luondduriggodatplána mihttomearrin lea stáhta eatnamiid ja čáziid buoremus vejolaš ja suvdilis oppalašávki. Sápmelaččaid ruovttuguovllu luondduriggodatplána doaibmaprográmma vuođđun lea Meahciráđđehusa strategiija. Strategiijas váldojuvvon doaimma váldolinnját leat:
1. Vásttolaš ja ovttasbargui vuođđuduvvan doaibma ja dan ovddideapmi
2. Dálkkádatrievdama goahcan ja dasa vuogáiduvvan
3. Luonddu máŋggahámatvuođa dorvvasteapmi ja lasiheapmi ja kulturárbbi dorvvasteapmi
4. Guovllu olbmuid buresveadjin sihke guovllu lundui ja luondduváriid ala vuođđuduvvon ealáhusaid eavttuid dorvvasteapmi ja ovddideapmi (biodoallu)
Váldolinjjáid vuollái leat lasihan listui konkrehtalaš doaibmabijuid, mat huksejit olles luondduriggodatplána vuođu. Doaibmabijut leat oktiibuot 94 ja daid ollašuvvan čuvvojuvvo jahkásaččat.
Meahciráđđehus sápmelaččaid ruovttuguovllus
Sápmelaččaid ruovttuguovllus 90 proseantta leat Meahciráđđehusa hálddus lean stáhta eatnamat. Dain 72 proseantta leat Meahciráđđehusa Luonddubálvalusaid hálddašan suodjalan- ja meahcceguovllut ja 13 proseantta Meahciráđđehusa Giddodatovdáneami hálddašan luondduealáhusguovllut. Vuovdedoalu hálddus leat 15 % guovllu viidodagas, ja das sulaid bealli vuovdedoallodoaimma anus.
Lassidieđut:
Prošeaktaoaivámuš Olli Lipponen, t. 0206396520, olli.lipponen@metsa.fi
Stivrenjoavkku sátnejođiheaddji Pirjo Seurujärvi, t. 0206397704, pirjo.seurujarvi@metsa.fi
Saamelaisten kotiseutualueen luonnonvarasuunnitelma 2022–2027
https://julkaisut.metsa.fi/julkaisut/show/2649
Sápmelaččaid ruovttuguovllu luondduriggodatplána 2022–2027
https://julkaisut.metsa.fi/se/almmustahttimat/show/2650