Eanodaga, Anára, Ohcejoga ja Soađegili davveosiid guovddáš čanusjoavkkuin čoagganan luondduriggodatplána ovttasbargojoavku čoahkkanii 27.4. gieđahallat ja gárvvistit doaimma linnjemiid. Luondduriggodatplána lea mihttomearri ovdánit cealkámušjorrosii geassemánus.
Čavčča rájes bargan ovttasbargojoavkku doaibman lea gávdnat suvdilis čovdosiid, mat heivehit oktii guovllu máŋggaid ávkkástallandárbbuid, dego boazodoalu, luonddusuodjaleami, vuovdedoalu, fuođđodoalu sihke áhpásmuhttinanu ja luondduturismma. Jagi loahpas gárvvásmuvvi luondduriggodatplána stivre Meahciráđđehusa doaimma ja mihttodallá luondduváriid ávkkástallama sámiid ruovttuguovllus čuovvovaš viđajagiáigodagas.
Mihttomearrin suvdilis čovdosat ja bajásráhkadeaddji ovttasbargu
Sámiid ruovttuguovllu guoddi luondduriggodagaid dikšuma ja ávkkástallama vuođđojurddan čuovvovaš plánaáigodagas lea ovddidit bajásráhkadeaddji ja buot oassebeliid gudnejahttán, suvdilis čovdosiidda figgan ovttasbarggu.
Plánas váldolinnján leat Meahciráđđehusa strategiijas loktanan temát vásttolašvuohta ja ovttasbargu, dálkkádatrievdan, luonddu máŋggahámatvuohta ja kulturárbi sihke buresveadjin ja ealáhusat. Ovttas čanusjoavkkuiguin gárvvistuvvon doaimma linnjemat ja doaibmabijut govvejit, mo strategiija linnjemat ollašuhttojuvvojit geavatlaččat guovllu luondduriggodagaid dikšumis ja ávkkástallamis.
Máŋggabealat oktasašplánemis ollašuhttimii
Ovttasbargojoavkku bargu álggii čakčat ovttasbargojoavkku jearahallamiiguin, mas kártejedje doaibmabirrasis dáhpáhuvvan nuppástusaid ja joavkku lahtuid mihttomeriid ja sávaldagaid. Guovtti ovttasbargojoavkku deaivvadeami, nuoraid bargobáji, sámenuoraid gullandilálašvuođa, gieldda olbmuid gullandilálašvuođaid, temájoavkkuid bargobajiid ja rabas kártajearahallama maŋŋá sáhtte čohkket evttohusa doaimma linnjemiin, maid gárvvisteami ja ovddideami Meahciráđđehusa áššedovdiin čohkkejuvvon prošeaktajoavku jotkkii. Dán evttohusa ovttasbargojoavku ain gárvvistii ovddas guvlui goalmmát deaivvadeamis. Eanemus ságastallama bokte bieggafámu sihke meahccebivdui ja áhpásmuhttinanu ordnemii laktásan doaimmat.
Ovttasbargojoavkku bálddas doaibmá Sámedikki nammadan Akwé: Kon -bargojoavku, mainna sihkkarastit, ahte sámekultuvrra hárjeheami eavttut váldojuvvojit buoremus vejolaš lági mielde vuhtii. Joavku árvvoštallá doaibmaprográmma váikkuhusaid sámekultuvrra hárjeheapmái, man maŋŋá plána ovdána cealkámušjorrosii.
Cealkámušjorrosis ožžojuvvon máhcahaga, Akwé: Kon -bargojavkku árvvoštallama, lágas ásahuvvon ráđđádallamiid, ovttasbargojoavkku njealját bargobáji ja dáin boahtán nuppástusdárbbuid gieđahallama maŋŋá plána ovdána Meahciráđđehusa stivra nannemii loahppačavčča 2021. Nannejuvvon luondduriggodatplána ollašuhttigohtet jagi 2022 álggu rájes.
Lassedieđut sámiid ruovttuguovllu luondduriggodatplánas addet:
Prošeaktaoaivámuš Olli Lipponen, t. 0206396520, olli.lipponen@metsa.fi
Stivrenjoavkku sátnejođiheaddji Jyrki Tolonen, t. 0206397640, jyrki.tolonen@metsa.fi
www.metsa.fi/saame-lvs