Spelledoasat, plastihkat, foliot, duhpátfilterat. Vánddardeaddjit leat eanaš čorges olbmot, muhto moaddege ludnejeaddji ožžot luonddus bahá áigái. Reppuretki.fi-siiddut ja Máttanuorta Suoma ámmátallaskuvlla vánddardeaddjit hástet čoaggit luonddus ruskkaid ja sii doibmet ieža ovdamearkan čakčavánddardeami áigge Muotkkeduoddaris. Váldde hástalusa vuostá!
Čakčamánu 15. beaivve dollojuvvo riikkaidgaskasaš čorgenbeaivi, muhto luonddu beales sáhttá bargat buori vaikke juohke beaivve. Ruskkaid guođđin lundui lea váttisvuohtan máŋgga riikkas. Luonddu nuoskideaddji ruskkat gávdnojit maiddái Suomas. Daid bálkot geaidnoguoraide ja juoba luonddus návddašit vuolgi vánddardeaddjit sáhttet guođđit daid maŋŋáseaset. Nieba dasto báhcá luonddus návddašeapmi eará vánddardeaddjiide uhcánin.
Reppuretki.fi-siiddut ja Máttanuorta Suoma ámmátallaskuvlla vánddardeaddjit hástet buot luonddus johttiid čoaggit lundui gulakeahtes ruskkaid ja dávviriid.
– Álbmotmehciid ja eará luonddučuozáhagaid ruskafuolahussii jávkkiha euroid hivvodat jahkásaččat. Dađe stuorát submi lea, mađe fuollameahttumit ruskkat guđđojit lundui, ja dat lea eret eará vánddardeaddjiid ja luonddu ávkin bargojuvvon barggus. Lea nappo fiinna ášši, ahte leat luonddu ustibat, geat iežaset ovdamearkkain movttiidahttet earáidge doaibmat riekta, giitá álbmotmeahccehoavda Pirjo Seurujärvi Meahciráđđehusas stuđeanttaid.
Njealjelogi stuđeantta Suomas, Duiskkas ja Nuortariikkas vánddardit vahku Muotkkeduoddara meahcceguovllus. Meahccedáidduid oahpahallama lassin stuđeanttat čogget vánddardeaddjiid, guolásteaddjiid ja meahcásteaddjiid guođđán ruskkaid. Dolastallanbáikkiin gávdnojit ovdamearkan ruston borramušdoasat, foliot ja plastihkat. Stuđeanttat buktet iežaset čoaggin ruskkaid geaidnogurriii, gos Meahciráđđehusa Luontopalvelut viežžá daid doalvun láhkai ruskafuolahussii.
– Leat stuđeanttaiguin vánddardan Muotkkeduoddara áidalas meahcis logiid jagiid áigge. Háliidat boahttevuođasge beassat návddašit buhtes luonddus. Danin movttiidahttitge earáge vánddardeaddjiid oassálastit oktasaš čorgemiidda vánddardanguovlluin ja álbmotmehciin, muitala lektor Tommi Pantzar Máttanuorta Suoma ámmátallaskuvllas.
Mii čorget Suoma ovttas. World Cleanup Day čohkke olbmuid miehtá máilmmi doaibmat buhtes birrasa beales. Čorget birrasa seammá áigge 150 riikkas.
Lassidieđut
- Muotkkeduoddara meahcceguovlu (www.lundui.fi)
- Ribahis vánddardeapmi (www.lundui.fi)
- Reppuretki.fi-siiddut, Olli Järvenkylä (www.reppuretki.fi, suomagillii)
- Riikkaidgaskasaš čorgenbeaivi (www.worldcleanupday.fi, suomagillii)