Taan keesi Meccihaldâttâs puáris já luánduviđá meecij inventisteeh pargeh Iänuduv, Ucjuv já Aanaar kieldâi kuávlust sehe Suáđigil taveoosijn. Inventistemnáál láá sehe vyevdikuávluh já tuodârsuáhimeecih.
Sämmilij päikkikuávlu inventistmân láá pálkkááttum puohnissii 30 mecciáámmátlâžžâd, kiäh algâtteh pargoid meecist kesimáánu aalgâst. Inventistemnáál kuávlu ana sistees sehe meccituálu kiävtust leijee kuávluid já luándutuálukuávluid.
Meecist jođedijnis inventisteeh árvušteleh suojâlemkriterijd máhđulávt tevdee meecijd. Meccimittedmeh čielgejeh muorâi ave já ciägu- já eennâmmieskâmuorâ saijaavuođâ. Ton lasseen inventisteeh kirjejeh ovdâmerkkân, mon ennuv pokkemuorah já suárvih tiättojeh. Sij oceh meid čalmemiärálávt máhđulii oovdeb vyevdikieđâvuššâm luodâid tego stuuhijd, aijuid já vyeijimluodâid. Inventistei tarkkuumeh vuáđuduveh staatârääđi tuhhiittem puáris já luánduviđá meecij aalmuglijd kriteráid.
“Sämmilij päikkikuávlust paijeel 90 prosentid láá staatâ haldâšem eennâm- já čäcikuávluh. Eennâmvijđoduvâin čiččâm prosentid láá meccituálu tooimâ siste leijee lonolâskiävttumeecih, ađai váldu-uásist ton kuávlust ij hárjuttuu meccituálu”, muštâl Meccihaldâttâs Meccihaldâttâs Oy meecijkevttim- já vuávámhovdâ Hannu Lehtonen.
Luándutuálukuávluh sajaduveh Paje-Laapi váldumaađijij piällás maađijij já mecci- tâi suojâlemkuávlu kooskân. Luándutuálukuávluh láá meccituálukiävtu ulguubeln já toi váldukevttimhäämih láá puásuituálu, eres luánduiäláttâsah sehe miäcástem já kuálástem.
“Luándutuálukuávlui vijđoduv, hastâleijee tiilij já vädis juvsâttetteevuođâ keežild toi inventistmist teddâšuveh káiduskarttimmetodeh”, eennâmkevttimhovdâ Perttu Finne pááhud.
Luándutuálukuávluh láá teháliih sehe páihálâšsiärvusáid já eennâmpiäluštem uáinust.
“Tondiet váldumaađijij kuábbáá-uv pele räijejuvvojeh oovtâ kilomeetter kobdosiih stielâseh, moh kuáđđojeh inventistem já suojâlemiävtuttâsâi ulguubel. Taat taha älkkeebin ovdâmerkkân páihálij infrahaavâi olášuttem, čuákkipaaihij ovdedem já eennâmpiäluštem táárbui tevdim, Finne muštâl.
Inventistmist lii sooppâm eennâm- já meccituáluministeriö keessim oovtâstpargojuávkku, mast láá lamaš ovdâsteijeeh eennâm- já meccituáluministeriöst, pirâsministeriöst, Meccihaldâttâsâst já Sápmi-juávhust.
Lasetiäđuh
Meccihaldâttâs Meccihaldâttâs Oy, meecijkevttim- já vuávámhovdâ Hannu Lehtonen, p. 040 583 6983
Meccihaldâttâs Kiddodâhovdedem, Eennâmkevttimhovdâ Perttu Finne, perttu.finne@metsa.fi, p. 040 508 8991