Kuálásteijei vyerdim nohá, ko lopevyebdim Ucjuuhân, Anarân já Iänudâhân álgá puáttee ohhoost . Kieldâässeeh pyehtih talle lonnoođ koskoho 22.5. tme 9 rääjist luándukuávdáin 40 euro pajelove, moin uážžu kuálástiđ vuoggáin kieldâ kuávlu juhâčuosâttuvâin. Olgopäikkikoddáliih pyehtih älgiđ majebaargâ 21.5. tme 9 skappuđ tiätu čuosâttuvváid uáivildum jándurluuvijd Eräluvat-nettikäävpist tâi palvâlemnumerist 020 69 2424.
Kuálástempaje álgá stuárráámuu uásist juhâkuávluin 1. kesimáánust. Vyebdim älgim lii taan ive maŋanum. Ovdâskodde meridij kuálástemlaavâ nubástutmist njuhčâmáánust, mon maŋa Meccihaldâttâs ráđádâlâi páihálijguin já Sämitiggijn kuálástem orniistâlmijn.
Taan maŋa Meccihaldâttâs puovtij adeliđ uđđâ tiätumerimiärádâs, mast meridii kuálástemluuvij stuárráámuid meerijd. Vyebdim láá puáhtám algâttiđ iäskán talle, ko miärádâs väidimäigi nuuvâi já eennâm- já meccituáluministeriö nonnij kieldâässei juhâluuvij hade. Hadde lii 40 eurod.
Ucjuuvâ, Aanaar já Iänuduv fastâ kieldâässeeh pyehtih lonnoođ koskoho rääjist pajelove juuváid, moh láá luosâ tâi kuávžur kuárŋumkuávluh. Vyeliahasáid love lii nuuvtá. Luuvijn iä lah tiätumereh, nuuvt ete tom pyehtih lonnoođ puoh páiháliih ässeeh. Páiháliih ässeeh pyehtih lonnoođ jieijâs pajelove Paje-Laapi luándukuávdáást Siidast, Meccihaldâttâs Avveel palvâlemsaajeest já Tuodâr-Laapi luándukuávdáást Iänuduvvâst.
Olgopäikkikoddáliih pyehtih uástiđ jándurluuvijd tiätu čuosâttuvváid Paje-Laapi juuvâin. Tain luuvijn láá tiätumereh. Taid luuvijd puáhtá skappuđ 21.5. tme 9 rääjist Eräluvat.fi-nettikäävpist tâi palvâlemnumerist 020 69 2424.
Kieldâässee mávsuttes kuálástemlope Ucjuuvâst, Anarist já Iänuduvvâst lii ain vyeimist staatâ čaasijn, moh láá eres ko luosâ tâi kuávžur kuárŋumkuávluh. Mávsuttes lope eres kuávloid kuáská vuoggâ- já pivduskuálástem. Mäksimnáál juhâlope ton saajeest kuáská tuše vuoggâkuálástem.
Puoh kuávluh, maid loveh kyeskih, uáinojeh Meccihaldâttâs Eräluvat.fi-palvâlusâst. Lasseen Meccihaldâttâs almostit äššigâssáid Tuikki-loostâ spesialnummeer Paje-Laapi kuálástmist.
Lasetiäđuh (suomeksi)
Pivdovuávájeijee Jarmo Huhtamella, 0400 395534, Meccihaldâttâs
Spesialvuávájeijee Markku Seppänen, 0400 397535, Meccihaldâttâs
Pivdotuáluhovdâ Juha Ahonen, 040 6464250, Meccihaldâttâs