Meahciráđđehusa váldohoavda Pentti Hyttinen lea cealkán eret doaimmastis persovnnalaš sivaid dihtii.
– Áššiid prioritehtaortnet lea eallimis dál nuppástuvvan, go lagaš olmmoš lea duođalaččat buozus ja buorre ustiban jámii gieskat, muitala jagi 2016 rájes váldohoavdan doaibman Hyttinen.
– Mus livččii lean vel guovtti jagi áigodat váldohoavdan, muhto dán dilis oainnán, ahte doaimma ollislaš dikšun ii leat dál mu áiggegeavaheami ektui vejolaš. Mielastan Meahciráđđehusa oppalašávkki dáfus lea buoret, ahte dán váttolaš doaimma dikšu olmmoš, guhte bastá bidjat dasa návccaid olles leavttuin.
Hyttinen giitá Meahciráđđehusa bargoveaga ja dan iežas stivrra ja ministeriijaid, mat stivrejit Meahciráđđehusa doaimma ja čanusjoavkkuid oktasaš jagiid ovddas. – Leat ovttas lihkostuvvan fáhtet bures daid mihttomeriid, maid oaiveministtar Sipilä ráđđehus jagi 2016 midjiide meroštalai. Dál Meahciráđđehusas sirdašuvvet ođđa muddui oaiveministtar Rinne ráđđehusprográmma dihkkádan luottain.
– Giittán váldohoavdda Hyttinen vássán golmma jagis. Dán áigge ođđa meahciráđđehuslága čuvvon doaibma lea álgán bures ja bohtosat muitalit dan beales. Mannan jahki lei Meahciráđđehusas buoremus juohká mihttára mielde. Gudnejahtán Pentti mearrádusa prioriseret áiggis ja sávvat sutnje buot buori boahttevuhtii, dadjá Meahciráđđehusa stivrra sátnejođiheaddji Timo Laitinen.
Meahciráđđehus lea stáhta fidnolágádus, mii dikšu ja ovddida stáhta oamastan eana- ja čáhceguovlluid, mat gokčet goalmmádasa Suoma viidodagas. Organisašuvnna bálvalusas leat sulaid 1200 olbmo oktiibuot 40 doaibmasajis miehtá Suoma.
Meahciráđđehusa váldohoavdda sadjásažžan doaibmá čakčamánu álggu rájes Tuomas Hallenberg doaisttážii.
Lassidieđut:
Pentti Hyttinen, tel. 040 546 5227
Timo Laitinen, tel. 0400 603561, Meahciráđđehusa stivrra sj.