Eana- ja meahccedoalloministeriija ásahii suoidnemánus Meahciráđđehusa guovlluguovdasaš ráđđádallangotti ođđa sátnejođiheaddjin Erkki Parkkinen. Eanagottálaš ráđđádallangottit Lappi, Davvebađaeatnama ja Kainuu ja Davvi-Gárjila guovlluin doibmet guovlluguovdásaš mearrádusadahkama doarjjan.
Go ráđđádallangotti ovddeš sátnejođiheaddji Tanja Joona válljejuvvui Meahciráđđehusa hálddahussii, nammaduvvui Erkki Parkkinen ođđa sátnejođiheaddjin. Lappilaš Parkkinen bargá Salla gielddahoavdan ja sus lea guhkes bargovásáhus advokáhttan ja gielddahoavdan.
”Meahciráđđehus lea Lappis árbevirolaččat hui mearkkašahtti doaibmi. Vuovdedoallu, Luonddubálvalusat ja luonddusuodjaleapmi, Meahccebálvalusat, Giddodatovdáneapmi – dát Meahciráđđehusa doaibmasektorat guoskkahit vugiin dahje nuppiin buohkaid lappilaččaid. Lappi guovlluguovdásaš ráđđádallangottis lea buorre dilálašvuohta ovddidit Meahciráđđehusa siste doaimmaid dialoga sihke earenoamážit oktiiheivehit Meahciráđđehusa doaibmama ja eanageavaheami Lappi máŋggabealat ealáhusráhkadusain ja eanagotti eallinfámolašvuođa dássedettolaš ovddidemiin. Dán oktasaš bargui háliidan ráđđádallangotti ođđa sátnejođiheaddjin buktit iežan máhttima ja áššedovdámuša”, gávnnaha Parkkinen.
Rolla mearrádusdahkama doarjjan
Meahciráđđehusa doaibmamii čuohcán earálágan vuordámušaid vásttolaš oktiiheiveheapmi gáibida guoibmivuođa ja ovttas doaibmama. Ráđđádallangotti bargun lea doaibmat stáhta guovlluid guoskan mearrádusdahkama veahkkin ja addit Meahciráđđehussii cealkámušaid mearkkašahtti gázaldagain mat laktásit stáhta eana- ja čáhceguovlluid geavaheapmái. Ráđđádallangoddi dahká álgagiid báikkálaš veaga sajádaga vuhtiiváldimin ja sierra doaimmaid oktiiheiveheapmin.
Ráđđádallangoddi čoahkkanii ođđa sátnejođiheaddji jođihemiin vuosttamuš háve 23.9. Roavvenjárggas. Čoahkkimis bohte ovdan Ukraina soađi dagahan hástalusat: energiija ja muora buktima nohkan Ruoššas, elrávnjji, energiija ja boaldámušaid hattiid loktan ja das boahtán hástalusat ealáhuseallimii sihke ee. fievrridan- ja mašenfitnodatdoalliide. Ovdan bohte maiddái fuolahussihkkarvuođa nannema dagahan vejolašvuođat Lappi energiijamurrii ja bieggafámu buvttadeapmái. Bargofámu váiluma čoavdin lei okta ovdan boahtán áššiin.
Eana- ja meahccedoalloministeriija ásaha buot ráđđádallangottiid lahtuid čánusjoavkkuid ovdanbuktimiid vuođul. Lahtut válljejuvvojit njealji jagi doaibmabadjái. Ođđajagimánus 2021 nammaduvvon ráđđádallangottiid doaibmabadji bistá 21.1.2025 rádjái.
Lassedieđut: Erkki Parkkinen, erkki.parkkinen@salla.fi, tel. 0400393987