Almmustahtton 10.3.2023

Meahciráđđehus olahii buorre ollislašbohtosa

Meahciráđđehus olahii jagis 2022 sihke ekonomalaš ja doaimmalaš mihttomeriid. Meahciráđđehuskonseardna fitnodatdoaimma boađus lei 150,9 miljovnna euro, ja investeremat biodiversitehta dorvvasteapmái ja earáide servodatlaš ávkkiide lokte badjel 80 miljovnna euroi. Meahciráđđehusa doaibman ovddida Suoma dálkkádatmihttomeriid ollašuvvama ja luovvá buresveadjima guovlluide ja ovttaskas olbmuide.

Meahciráđđehuskonseardna vuovdimat jagis 2022 lei 423,3 miljovnna euro ja boađus 150,9 miljovnna euro. Buorre boađus boahtá muora buorre jođus ja hattis ja bieggafámu fidnoovddideamis. Fitnodatdoaimma investeremat luonddu máŋggahámatvuođa ovddideapmái ja eará servodatlaš ávkkiide lokte 80,3 miljovnna euroi. Meahciráđđehus máksá ovddit jagi bohtosis stáhtii 110 miljon euro.

-Jahki 2022 lei hástaleaddji, muhto olaheimmet buorre bohtosa ja ovddideimmet seammás biras-, dálkkádat- ja eará strategalaš mihttomeriideamet. Sierra mihttomeriid oktiiheiveheapmi ja luonddu máŋggahámatvuođa dorvvasteapmi leat min guovddáš doaimmat ja buot menestumi gáibádussan, gávnnaha Meahciráđđehusa váldohoavda Juha S. Niemelä.

Stáhta lotnolasgeavahanvuvddiid jahkásaš šaddan lea badjel 13 miljovnna guđahasmehtera. Jagi 2022 lotnolasgeavahanvuvddiin váldojuvvui muorra 5,9 miljovnna guđahasmehtera, mii lea uhcit go ovddit jagi. Meahciráđđehusa suvdilis muorračuohppanplána meroštallat guvllolaš luondduriggodatplánain ovttas čanasjoavkkuiguin. Mannan jagiin stáhta vuvddiid čuohppamat leat báhcán juoga veardde luondduriggodatplánain meroštallon dási vulobeallái.

-Vuovdedoalus investeremat čuhce mannan jagi earenoamážit aktiivvalaš luonddudikšunbargguide, áitatvuloš šlájaid vuhtiiváldimii ja dálkkádatjierpmálaš doaibmamii. Min mihttomearrin lea šaddadit lotnolasgeavahanvuvddiid čitnanjieluid 10 proseanttain jagi 2035 rádjái, muitala Niemelä.

Stáhta suodjalanguovlluin ja lotnolasgeavahanvuvddiin dahke mannan jagi earenoamáš viidásit luonddu máŋggahámatvuođa ovddideaddji ovddežiiddikšun- ja luonddudikšunbargguid, oktiibuot 17 400 hehtára. Stuorimus viidodagat bohte jekkiid ovddežiiddikšumis. Lassin Meahciráđđehus divodii rávdnječáziid ja guliid eallinbirrasiid ja jávkadii eret guliid goargŋuneastagiid. Suodjalanguovlluin barggut dahkkojedje Helmi-eallinbirasprográmma ja EU:aLIFE-ruhtadeami vehkiin. Lotnolasgeavahanvuvddiin doaibmabijuid dahke Meahciráđđehus Vuovdedoallu Os boađusruhtadusain.

Buhtis energiija dárbu ja ruoná sirdašupmi leat beavttálmahttán bieggafámu fidnoovddideami stáhta guovlluin. Fidnoovddideapmái gullet álo viiddis luonddu- ja birasčielggadusat. Stáhta guovlluin leat dál 157 bieggafápmorusttega. Daid oktasašbeaktu lea sullii 590 MW ja dat buvttadedje jagi 2022 energiija sullii 1500 GWh.

Mearrabieggafámu fidnoovddideamis olahedje dehálaš mihttomeari, go Meahciráđđehus vuolláičálii ovttas Vattenfalliin soahpamuša Korsnäs ovdabeallái plánejuvvon mearrabieggafápmopárkka ovddideamis ja huksemis. Guoimmi válljemis oktan guovddáš dahkkin lei evttohasa doaimma vásttolašvuohta.

-Bieggafámu fidnoovddideapmi joatkašuvvá beaktilin maiddái dán jagi sihke eatnama ja meara alde. Mis leat eatnama alde máŋggat iežas ja oktasaš fidnut ja meara alde mii buktit márkaniidda guokte ođđa fidnoguovllu. Ođasmuvvi energiija lasiheapmi ovddida maiddái Suoma čitnaneutrálavuođamihttomeari olaheami, Niemelä muitala.

Luonddus lihkadeami bivnnutvuohta seaillui buorrin, vaikko álbmotmehciid galledeaddjimearit gahčče koronapandemiija áigásaš earenomáš buorre loguin. Jagi 2022 álbmotmehciid ja Meahciráđđehusa earáid luonddučuozáhagaid oktiirehkenastojuvvon gálledeaddjimearri lei 7,4 miljovnna galledeami. Meahcceáiggeájiid bivnnutvuohta seaillui jagi 2021 dásis.

Niemelä mielde stáhta eana- ja čáhceguovlluide čuhcet maiddái boahttevuođas olu vuordámušat, mat gáibidit ollesáigásaš doaibmama ovddideami.

-Mii fertet bidjat deattu vel eanet go dál rabas ságastallamii ja sierra mihttomeriid vásttolaš oktiiheiveheapmái.

Lassedieđut:
Váldohoavda Juha S. Niemelä, juha,niemela(at)metsa.fi, tel. 0206 39 4201

Meahciráđđehusa jahke- ja vásttolašvuođaraporta (suomagillii):
https://julkaisut.metsa.fi/julkaisut/show/2838