Almmustahtton 28.12.2022

Meahciráđđehus muittuha gieldda olbmuid vásttolaš vuodjimis Davvi-Sámi luonddus dálvit

Anára, Ohcejoga ja Eanodaga fásta ássit sáhttet ođđajagimánu álggus ohcat fas nuvttá muohttaga áigge meahccejohtaluslobi ruovttugielddas lean stáhta eatnamiidda čuovvovaš golmma jahkái, go ođđa dihtomearreáigodat álgá. Meahciráđđehus háliida muittuhit mohtorgielkkáin vuoddjiid vásttolaš doaimmas. Mihttomearrin lea, ahte báikkálaš ealáhusaide ja lundui eai čuoza hehttehusat.

Meahciráđđehus lea ožžon máhcahaga, ahte muohttaga áigge oaivvilduvvon gieldda olbmuid  meahccejohtaluslobi leat Suoma golmma davimus gielddas geavahan ain eanet crossalágan vuodjimii obbasis ja duoddariin. Lassin máhcahaga vuođul mohtorgielkkáiguin leat joatkán vuodjima govttohis guhkás giđđii ja meahcis leat vuodján menddo lossa fievrruiguin.

Gieldda olbmo meahccejohtaluslobi dárkkuhus lea, ahte lobi ožžon olmmoš sáhttá lihkadit ruovttugielddas guovllus meahcis vealtameahttun áššiin ja luondduávkkástallamis, ovdamearkan johtin guollečáziide.

– Meahccejohtaluslobi eavttuide leat boahtte jagi girjejuvvon dárkileappot, mo lobiin oažžu vuodjit. Mohtorgielkávuojašeapmi váriid alde dahje ng. crossen eai leat vásttolaš doaibma. Dušši vuojašeapmi hehtte báikkálaš boazodoalu ja golaha luonddu, muitala guovlluoaivámuš Elina Stolt Meahciráđđehusa Luonddubálvalusain.

Meahciráđđehus muittuha, ahte muohta galgá leat unnimustá 20 sentte, ovdalgo meahccejohtalus lea lobálaš. Mohtorgielká dahje eará fievru, mas leat jálásat dahje bealttat, oažžu deaddit eanemustá 800 kilo. Lobi oažžu galgá sihkkarastit, ahte ii hehtte jođus lean boazodoallobargguid dahje bohccuid guotteha.

– Ná suodjalat divrras Sámi luonddu gollamis ja geahpedat riskka, ahte meahccejohtalus hehttešii boazodoalu, Stolt dadjá.

Meahciráđđehusa stáđásmuvvan geavadaga mielde golmma davimus gieldda ássiide mieđihuvvo muohttaga áigge meahccejohtaluslohpi ruovttugielddas guovllus lean stáhta eatnamiidda. Lohpi ii gusto álbmot- dahje luonddumehciid. Gieldda olbmo meahccejohtaluslobi vuođđun lea riikkabeivviid cealkámuš fámus lean meahccejohtaluslága fápmuibidjama oktavuođas.

Fitnodatdoaimmas galgá álo soahpat sierra Meahciráđđehusain

Meahciráđđehus muittuha maiddái, ahte gieldda olbmuid meahccejohtaluslobiin ii oaččo hárjehit fitnodatdoaimma, dego reahkafievrridemiid, jus doaimmas ii leat sohppojuvvon Meahciráđđehusain sierra.

– Leat ožžon máhcahaga maiddái das, ahte dušše gieldda olbmo meahccejohtaluslobiin hárjehuvvo fitnodatdoaibma. Dát dilli lea eahpevuoiggalaš: oassi fitnodatdoalliin lea doaibman riekta ja soahpan fitnodatdoaimmas stáhta eatnamiin Meahciráđđehusain. Máhcahaga vuođul oassi fas ii leat doaibman riekta, Stolt dadjá.

Gieldda olmmoš, oza meahccejohtaluslobi ođđajagimánus

Gieldda olbmuid muohttaga áigge meahccejohtaluslobi sáhttá ohcat ođđajagimánus 2023 rájes, go ođđa Meahciráđđehusa meahccejohtaluslobiid guoskevaš dihtomearreáigodat álgá. Anára ja Ohcejoga guoskevaš meahccejohtaluslobiid ohcamis rávve Meahciráđđehusa Avvila bálvalanbáiki (ivalo@metsa.fi). Eanodaga lobiid bokte bálvala Duottar-Sámi luondduguovddáš (tunturi-lappi@metsa.fi).

Muohttaga áigge meahccejohtaluslobi ruovttugildii (erret álbmot- ja luonddumeahcit) sáhttá ohcat maiddái Eräluvat-neahttagávppi bokte (verkkokauppa.eraluvat.fi, suomagillii).

Gieldda olbmuid bievlla áigge meahccejohtaluslohpi sierra meroštallon meahcceluottaide sáhttá ohcat Meahciráđđehusa bálvalanbáikki bokte. Eanodaga bievlla áigge meahccejohtaluslobiid luottaide mieđihit easkka njukčamánu álggu rájes.

Bálvalanbáikkit veahkehit maiddái, jus gieldda olmmoš háliida gieldda olbmo meahccejohtaluslobi lassin maiddái soahpat fitnodatdoaimmas Meahciráđđehusa hálddašan guovlluin.