Almmustahtton 1.9.2021

Meahciráđđehus bivdá cealkámušaid sámiid ruovttuguovllu luondduriggodatplánii

Jagi loahpas gárvánit oaivvilduvvon luondduriggodatplána stivre Meahciráđđehusa doaimma ja bidjá mihtuid luondduriggodagaid ávkkástallama sámiid ruovttuguovllus čuovvovaš viđajagiáigodahkii. Plánii sáhttá oahpásmuvvat ja dasa sáhttá guođđit cealkámušaid lausuntopalvelut.fi-siidduin 20.9. rádjai.

Buot cealkámušat gieđahallojit, man maŋŋá luondduriggodatplána ovttasbargojoavku čoahkkana golggotmánu beallemuttus vel maŋimuš geardde. Golmma geardde čoahkkanan ovttasbargojovkui gullá viiddis joavku Meahciráđđehusa čanusjoavkkuin.

Čavčča 2020 rájes bargan ovttasbargojoavkku doaibman lea gávdnat čovdosiid, mat heivehit oktii guovllu eatnatlohkosaš ávkkástallandárbbuid, dego boazodoalu, luonddusuodjaleami, vuovdedoalu, bivdodoalu sihke áhpásmuhttinanu ja luondduturismma.

Mihttomearrin suvdilis ja vásttolaš čovdosat

Luondduriggodatplána doaibmaprográmma ollašuhttá Meahciráđđehusa strategiija ja dan váldolinnját leat:

1. Vásttolaš ja ovttasbargui vuođđuduvvan doaibma ja dan ovddideapmi
2. Dálkkádatnuppástusa goahcan ja dasa vuogáiduvvan
3. Luonddu máŋggahámatvuođa dorvvasteapmi ja lasiheapmi ja kulturárbbi dorvvasteapmi
4. Guovllu olbmuid buresveadjin sihke guovllu lundui ja luondduváriide vuođđuduvvan ealáhusaid eavttuid dorvvasteapmi ja ovddideapmi.

Ovttas čanusjoavkkuin dahkkon doaimma linnjemat ja doaibmabijut govvidit, mo strategiija linnjemat ollašuhttojuvvojit geavadagas guovllus luondduváriid dikšumis ja ávkkástallamis.

Plána atnui boahtte jagi álggus

Cealkámušjorrosis ožžojuvvon máhcahaga, ovttasbargojoavkku bálddas doaibman Sámedikki nammadan Akwé: Kon -bargojoavkku, lágasásahuvvon ráđđádallamiid, ovttasbargojoavkku njealját bargobáji ja dás boahtán nuppástusdárbbuid gieđahallama maŋŋá plána ovdána Meahciráđđehusa stivra nannemii loahppačavčča 2021. Nannejuvvon luondduriggodatplána ollašuhttigoahtit jagi 2022 álggu rájes.

Sámiid ruovttuguovllu luondduriggodatplánii sáhttá oahpásmuvvat čujuhusas www.metsa.fi/saame-lvs. Siidduin leat maiddái rávvagat cealkámuša addima várás.

Lassedieđuid addet:

Prošeaktaoaivámuš Olli Lipponen, t. 0206396520, olli.lipponen@metsa.fi
Stivrenjoavkku sátnejođiheaddji Pirjo Seurujärvi, t. 0206397704, pirjo.seurujarvi@metsa.fi