Meahciráđđehusa meahccebearráigeahčču dárkkistii mannan jagi measta 8 000 meahccebivdi ja eará luonddus lihkadeaddji. Juohke logát lei jođus almmá áššáigullevaš lobi dahje rihkui muđuid lága. Eanemus váttisvuođat ledje guollebivddus.
Badjel bealli buot áicojuvvon rihkkosiin stáhta guovlluin laktásit guollebivdui. Guollebivddu bearráigeahčus meaddimiid oassi lea loktanan olles 2010-loguáigge: Jagi 2010 meaddimat girjejuvvojedje 7,9 proseantta dárkkistusain, muhto diibmá, jagi 2018, meaddimiid mearri lei jo 18,9 proseantta.
– Lassáneami sivvii váikkuha beavttálmahtton bearráigeahčču earret eará Saimaas. Lassin bivdosiid merken lea nuppástuvvan dárkileabbon, eaige buohkat leat oahppan ođđa njuolggadusaid. Illudahtti lea, ahte ain hárvvit olmmoš bivdá guoli almmá guolleváriiddikšunmávssu”, Meahciráđđehusa meahccebearráigeahču alladárkkisteaddji Juha Ahonen gávnnahii Meahccebivdodoaimmaheaddjibeivviin.
Meahcástanmeaddimat njiedjan
Meahcásteaddjiid lobit ja lágačuovvun leat fas vehá buorránan. Mannan jagi 3,7 proseantta dárkkistuvvon meahcásteaddjiin ledje jođus almmá lobiid dahje ledje sivalačča meaddimiidda. Jagi 2010 dávisteaddji lohku lei 7,9 proseantta.
Meahccebearráigeahčču seahkanii maiddái stuorrabeađuid heađušteapmái dahje eahpádusaide lágahis goddimiidda ja bearráigeahčai lágalaš stuorrabeađuid bivddu. Dutkamii ovdánedje golbma roavis meahcástanrihkkosa, main guokte ihte lágalaš guovžabivddu oktavuođas ja okta laktásii lágahis guovžža goddimii.
Maiddái meahccejohtalusa lágalašvuohta buorránii ovddit jagiid ektui. Lihkká juohke viđat (18 %) dárkkistuvvon skohtervuoddji dahje njealjejuvllaga geavaheaddji lei sivalaš meaddimiidda. Jagi 2016 dávisteaddji lohku lei 26 proseantta.
Meahciráđđehusa meahccebearráigeahčus vástida meahccebearráigeahču alladárkkisteaddji ja 11 meahccebearráigeahčči. Sis lea ovttasbargu bolesiin, rádjegozáhusain ja tuolluin. Sesoŋŋaáigge meahccebearráigeahčču lasihuvvo lasseresurssaiguin.
Lassidieđut (suomeksi):
Juha Ahonen, 040 6464250
Jukka Bisi, 040 5370993