Guollebivdi galgá máksit guolleváriiddikšunmávssu, jus lea 18-64 –jahkásaš ja bivdá guoli eará vugiin go oaggumiin, bilkemiin dahje sallitvuokkain. Juovllaid lahkonettiin Meahciráđđehus muittuha, ahte guolleváriiddikšunmáksu ii dávvirskeaŋkka láhkai noađut luonddu, muhto lea investeren luonddu, olbmo ja servodaga buresbirgejupmái. Mávssuin čoggon ruđaid geavahit ee. guollečáziid ja guollenáliid dikšumii.
Guollebivdái guolleváriiddikšunmáksu lea skeaŋka, mii lasiha buresbirgejumi. Ruovtturiikka guolli lea dearvvašlaš biebmu ja dan leat ávžžuhan borrat jeavddalaččat. Meahciráđđehusa dutkamuša mielde guollebivdu lasiha maiddái luonddus lihkadeami, buorida návccaid ja ložže miela. Ovttas vásihuvvon guolástantuvrra lasiha maiddái sosiála buresbirgejumi. Luonddu buresbirgejupmái guolleváriiddikšunmáksu váikkuha njuolgga sisaboađuid ávkkástallanbáikkis. Ruđaid ávkkástallet guollečáziid suvdilis ávkkástallama ja dikšuma plánemii ja ollašuhttimii sihke guollebivddu bearráigehččui, organisašuvnnaid rávvenbálvalusaide, guolledoalloguovlluid doibmii ja oamasteaddjibuhtadusaide. Servodahkii guolleváriiddikšunmávssu mearkkašupmi oidno álbmotdearvvašvuođa lassin barggolašvuođa bokte. Guolástanáigeádji lasiha máŋggabealat bálvalusjearu guolástanbáikkiin.
Guolleváriiddikšunmávssuin gávdno vuogas molssaeaktu aktiivvalaš ja duollet dálle guolásteaddjiide. 45 euro jahkemáksu heive dávjá jagi áigge guolásteaddjiide. Jahkemávssu máksán olbmui Meahciráđđehus sádde lassin guollebivddu gieđahallan Suomu-bláđi. Unnit mávssut leat vahku guolástanáiggi 15 euro ja ovtta jándora guolástanáiggi máksu 6 euro.
Birasdiđolaš olbmui guolleváriiddikšunmáksu lea buore skeaŋkaidea, vaikke guollebivdu ii livččiige áigeádji.
Hearvái skeaŋka leage olbmui, guhte oahpásmuvvá guollebivdui:
– Jándormáksoskeaŋkkain movttegis guollebivdi sáhttá luonddutuvrra áigge oahpásmuhttit beallelaččas dahje ustibis guollebivdui. Vahkkomáksu lea vuogas jurdda ovdamearkan bearašlahtuide geat leat geassebáikkis oanehis áiggiid ovttas, evttoha prošeaktaoaivámuš Mika Laakkonen Meahciráđđehusas.
Jagi 2020 guolleváriiddikšunmávssuid sáhttá oastit Meahciráđđehusa neahttagávppis čujuhusas www.eraluvat.fi, bálvalannummiris 020 69 2424, luondduguovddážiin ja R-kioskkain (bálvalanmáksu 3€) miehtá riikka. Neahttagávppis sáhttá printet skeaŋkakoartta guolástettiin dárbbašuvvon máksoduođaštusa giesaldahkan.
Lassidieđut:
Prošeaktaoaivámuš Mika Laakkonen, Meahciráđđehus, Fuođđobálvalusat, tel. 040 589 7559