Meahciráđđehusa Luonddubálvalusaid ja eaktodáhtolaččaid geassit 2019 dahkan goaskimiid beassedárkkistemiin gávnnahedje sulaid 380 ássojuvvon goaskinreviirra. Bessenboađus lei earenoamáš Oulujoga davábealde, ja máddelis boađus lei dábálaš. Buorre bohtosa duohken leat buorre biebmodilli ja oiddolaš dálkkit.
Dán jagi goaskima beassedárkkistusain gávnnahedje 161 lihkostuvvan bessema. Lihkostuvvan bessemat buvttadedje buohkanassii 205 goaskima čivgga, mat ledje dan agis, ahte sáhttá giddet rieggá juolgái.
Bessenbohtosa molsašuddan lea dábálaš goaskimii, ja maŋŋálas jagiin sáhttet leat stuorrage earut. Mannan jagi gávnnahedje oppa riikkas oktiibuot 92 lihkostuvvan bessema ja 108 čivgga.
Goaskima biebmodilli lea dán jagi buorre, go vuoncceslottit ja njoammilat ledje eanet diimmá ektui. Lassin giđđat ledje oiddolaš dálkkit bessema ektui.
Gávcci ođđa goaskinreviirra gávdnojedje
Olbmuid geažidemiid vuođul gávdne gávcci ođđa beasi juogo ovddeš reviirrain dahje áibbas ođđa. Meahciráđđehus máksá goaskima beasi almmuheaddjái ovdalis dovdameahttun beasis 99 euro gávdnanmávssu.
Suomas dovdet 552 goaskinreviirra, man ássojuvvon leat maŋimuš jagiid lean sulaid 450 reviirra. Dovdojuvvon reviirrain sulaid 90 proseantta leat boazodoalloguovllus.
Goaskima beassedárkkistusas ja goaskima boazodollui dagahan vahágiid reviiravuđđosaš buhtadanvuogádaga bargguin vástida Meahciráđđehusa Luonddubálvalusat. Dán jagi Meahciráđđehus dárkkistii helikopteriin measta buot boazodoalloguovllu goaskima besiid.
Lassidieđut:
Alladárkkisteaddji Tuomo Ollila, tel. 0400 241448; tuomo.ollila(at)metsa.fi