Bohccuid guohtun Eanodagas Malla luonddumeahcis lea smiehtahan ollu dáid jagiid. Meahciráđđehusa Luonddubálvalusaid, Birasministeriija ja boazodoalliid gaskasaš ráđđádallamiin diet ášši orošii dál vehážiid čoavdašuvvamin. Malla rašimus guovllut áidojuvvojit ja bohccuide ráhkaduvvo divresuodji hohkahan dihte daid dobbelii Mallas.
Luonddumeahcis guohttu bohccuid mearri lea lassánan jagiid mielde, ee. lassánan birashuksema ja johtalusa dihte. Meahciráđđehus evttohii diibmá gárvvásmuvvan Malla luonddumeahci dikšun- ja geavahanplánaárvalusas áiddi áiduma suddjen dihte luonddumeahci. Birasministeriija oainnu mielde guohtungielddu ollašuhttin dušše eiseváldedoaimmaiguin ii leat buorre meannudanvuohki, dasgo lea dehálaš oktiiheivehit guovllu historjjá, luonddusuodjaleami ja sámekultuvrra seailuma.
Dáid vuolggasajiid vuođul Meahciráđđehus bargagođii giđđat 2017 ovttas bálgosiin, Birasministeriijain, Helssega allaoahpahagain ja Sámedikkiin oažžun dihte báikkálaš soahpamuša dien guohtunáššis. Dál dahkat oaivvilduvvon geavatlaš doaibmabijuid ollašuhttimis sohppojuvvui álgogeasis 2018 Meahciráđđehusa, bálgosa ja Birasministeriija gaskasaš ráđđádallamis.
Divresuodji ja áiddit
Malla guohtundili čoavdin dihte geahččalit vuos, mo guvttiin doaibmabijuin sáhtášii váikkuhit. Kritihkalaš šaddogávdnosiid birra áidojuvvojit áiddit eastin dihte bohccuid guohtunváikkuhusaid šattolašvuhtii. Dasa lassin bohccuide dahkkojuvvo geahččalan dihte divresuodji Jiehkkášjávrri lulábeallai lagešordda bajábeallai suodjalanguovlluid olggobeallai hohkahan dihte bohccuid suodjái gáski divrriin. Bohccot bahkkejit geassit Malla jassasajiide erenoamážit gáski divrriid báhtui.
Dáiguin doaimmaiguin ii sáhte ollásit čoavdit Malla mávssolaš luondduárvvuid seailuma ja bohccuid guohtuma gaskasaš ruossalasvuođa, muhto daiguin goittotge oaidná sullii, mo ášši sáhtášii čoavdit boahtteáiggis. Doaibmabijuid váikkuhusat bohccuid guohtumii, johtimii ja Malla šattolašvuhtii čuvvojuvvojit. Geahččaladdan ollašuhttojuvvo Birasministeriija juolludan sierra ruhtademiin.
Lassedieđut
Meahciráđđehus, Luonddubálvalusat, Lappi
Guovlluhoavda Jyrki Tolonen, tel. 0400 388609, šleađgapoasta jyrki.tolonen(at)metsa.fi
Birasministeriija, Luonddubirasossodat
Birasráđđi Aulikki Alanen, tel. 040 684 7146, aulikki.alanen(at)ym.fi
Mallá luonddumeahcci (www.lundui.fi/se/mallaluonddumeahcci)