Dán gease Meahciráđđehusa boares ja luondduviđá vuvddiid inventerejeaddjit barget Eanodaga, Ohcejoga ja Anára gielddaid guovllus ja Soađegili davviosiin. Inventerema vuolde leat sihke vuovdeguovllut ja lagešvuovddit.
Sámiid ruovttuguovllu inventeremii leat bálkáhuvvon oktiibuot 30 vuovdesuorggi ámmátolbmo, geat álggahit meahccebargguid geassemánu álggus. Guovlu, mii inventerejuvvo, sisttisdoallá sihke vuovdedoalu guovlluid ja luondduruovttudoalloguovlluid.
Inventerejeaddjit árvvoštallet meahcis vuvddiid, mat vejolaččat devdet suodjalankritearaid. Meahccemihtidemiin čielggadit vuovddi agi ja ceaggo- ja eanamieskamuora saddjáivuođa. Dasa lassin girjejit ovdamearkka dihtii stohkiid ja sorvviid gávdnoštumiid.
Čalbmemihtu mielde ohcet maid ovddit vejolaš vuovdegieđahallama luottaid dego jalgŋáid, goivvohagaid ja vuodjinmáđijaid. Inventerejeaddjiid dárkkodeamit vuođđuduvvet stáhtaráđi dohkkehan boares ja luondduviđá vuvddiid našuvnnalaš kritearaide.
”Sámiid ruovttuguovllus badjel 90 % leat stáhta hálddašan eana- ja čáhceguovllut. Eanaguovlluin čieža proseantta leat vuovdedollui gullevaš máŋggaatnovuovddit, dahjege stuorámus oasis guovllus ii leat vuovdedoallu”, muitala Meahciráđđehus Vuovdedoallu Oy vuvddiidgeavahan- ja plánenjođiheaddji Hannu Lehtonen.
Luondduruovttudoalloguovllut leat Badje-Sámi váldogeainnuid guorain geainnuid ja meahcce- dahje suodjalanguovlluid gaskkas. Luondduruovttudoalloguovllut leat vuovdedoallogeavahusa olggobealde ja daid váldogeavahanhámit leat boazodoallu, eará luondduealáhusat leat meahcásteapmi ja guollebivdu.
”Luondduruovttudoalloguovlluid viidodaga, hástaleaddji diliid ja váttes juvssahahttivuođa dihtii daid inventeremis deattuhuvvojit gáidduskártenmetodat”, eanangeavahanhoavda Perttu Finne muitala.
Luondduruovttudoalloguovllut leat dehálaččat sihke báikkálaš servošiidda ja eananbealuštusa geahččanguovllus.
”Danin váldogeainnuid goappáge bealde ráddjejuvvojit ovtta kilomehtera govdosaš avádagat, mat guđđojuvvojit inventerema ja suodjalanevttohusaid olggobeallái. Dát álkidahttá ovdamearkka dihtii báikkálaš olbmuid infrafitnuid ollašuhttima, čoahkkebáikkiid ovddideami ja eananbealuštusa dárbbuid”, Finne muitala.
Inventeremis lea sohppojuvvon eanan- ja vuovdedoalloministeriija jođihan ovttasbargojoavkkus, mas leamašan ovddasteaddjit eanan- ja vuovdedoalloministeriijas, birasministeriijas, Meahciráđđehusas ja Sápmi-joavkkus.
Lassidieđut
Meahciráđđehus Vuovdedoallu Oy, Vuvddiidgeavahan- ja plánenjođiheaddji Hannu Lehtonen, tlf. 040 583 6983
Meahciráđđehus Giddodatovdáneapmi, Eanangeavahanhoavda Perttu Finne, perttu.finne@metsa.fi, tlf. 040 508 8991