Almmustahtton 13.3.2020

Birasministeriija nannii Giehtaruohttasa meahcceguovllu dikšun- ja geavahanplána

Birasministeriija lea nannen Giehtaruohttasa meahcceguovllu dikšun- ja geavahanplána, mainna linnjet guovllus dahkkon doaimmaid ja guovllu ávkkástallama. Meahciráđđehusa gárvvistan plána figgá heivehit oktii guovllu earálágan ávkkástallanhámiid ja mearkkašahtti luondduárvvuid.

Plánaguovlu lea dehálaš sámekultuvrii ja boazodollui ja maiddái dehálaš vánddardan-, luondduturisma. Ja guolástanguovlu. Guovlu gullá Natura 2000 -fierpmádahkii ja lea hui dehálaš duottarluonddutiippaid, áhpe- ja balsajekkiid ja šerres čázádagaid suodjalanguovlu.

Plána doaibmá maiddái oaivádussan, mii dihkkáda Meahciráđđehusa doaimma guovllus ja stivre guovllu áhpásmuhttin- ja eará anu sihke luonddu ja kultuvrra suodjaleami.

 

Ávkkástallan stivrejuvvo avádagain

Guovlu lea juhkkojuvvon avádagaide. Vánddardan- ja luondduturismma avádagat gokčá 17 % guovllus, ja doppe lea eanaš oassi vánddardeami bálvalanrusttegiin, áhpásmuhttinanus ja luondduturismadoaimmas. Eanas oassi lea boaittobealavádat, gosa áhpásmuhttinatnu ii aktiivvalaččat stivrejuvvo. Plánaguvlui gullan Ánnjaloanji smávva luonddusuodjalanguovlu lea ráddjen- ja luondduárvoavádat.

Turismadoaibma stivrejuvvo luondduárvvuid ja sámekultuvrra eavttuid vuhtii váldimiin. Prográmmabálvalusfitnodatdoalliide sáhttá mieđihit fitnodatlobiid ja sierra sohppojuvvon luottaide skohtersafárilobiid. Guovllus leat 20 ávdin-, várren- dahje beaivestobu ja golbma láigostobu. Bálvalusráhkadusaid ja vuoiŋŋastanbáikkiid sáhttá ođasmahttit, stobuid divvut, viiddidit, jávkadit dahje sirdit heivvolut báikái ja nuppástuhttit daid ávkkástallanulbmila.

Plánas eai leat váikkuhusat guovllu meahcce- ja guollebivdoordnemiidda.

 

Plána ovddida meahcceguovlolága mihttomeriid

Meahcceguovlolága mielde Meahciráđđehus galgá gárvvistit meahcceguovlluin dikšun- ja geavahanplána, man birasministeriija nanne.

Birasministeriija oaidná, ahte plána nannen čuovvu meahcceguovlolága mihttomeriid. Birasministeriija maiddái deattuha Giehtaruohttasa meahcceguovllu luondduárvvuid áidnalunddotvuođa ja deattuha guovllu dikšuma ja ávkkástallama ollašuhttimis bearráigeahču ja váikkuhusaid árvvoštallama ja daid vuođul dahkkon doaimmaid mearkkašumi sámekultuvrii ja luondduealáhusaid hárjeheami eavttuid dorvvasteapmái.

Buot meahcceguovllut leat vuođđuduvvon guovlluid meahcceguovloluonddu seailluheapmin, sámekultuvrra ja luondduealáhusaid dorvvasteapmin sihke luonddu máŋggabealat ávkkástallama ja dan gáibádusaid ovddideapmin. Giehtaruohttasa meahcceguovllus fitnet jahkásaččat sulaid 150 000 geardde, ja dat leat Lappi guovllu 12 meahcceguovllus ealaskeamos guovlu.

 

Lassidieđut

Meahciráđđehus, Luonddubálvalusat, guovlluhoavda Jyrki Tolonen, telefon 0400 388609

Dikšun- ja geavahanplána https://www.metsa.fi/kasivarsisuunnittelu

Giehtaruohttasa meahcceguovllu neahttasiiddut https://www.lundui.fi/giehtaruohtas