Birasministeriija dieđáhus 7.5.2018
Álbmotmeahccái laktojuvvošii measta 200 hektára suodjaleapmái skáhppojuvvon árvvolaš luonddučuozáhagaid ja earuhuvvošii vuollel logi hektára guovlu Dávgevári luondduguovddáža birrasis. Ráddjennuppástus dagašii vejolažžan luondduguovddáža ovddideami máŋggabealagabbot go dál.
Birasministeriija válmmaštallá smávva nuppástusa Urho Kekkonen álbmotmeahci rádjái. Álbmotmeahci máttaravddas lea mihttomearri ráddjet álbmotmeahci olggobeallái sulaid 9,3 hektára viidosaš, E75-geainnu rádjai ollán Dávgevári luondduguovddáža guovllu. Seammás álbmotmeahccái laktojuvvošii dan davvenuorta ravddas Šuomajoga guoras sulaid 198 hektára guovlu.
Ráddjennuppástus dagašii vejolažžan Dávgevári luondduguovddáža ja dan giddodaga máŋggabealagabbo anu ja ovddideami go dál. Luondduguovddáža guovlu livččii ain stáhta oamastusas ja oassin Natura 2000 -fierpmádagas, ja dat bálvalivččii boahttevuođasge álbmotmeahcis johtán olbmuid dárbbuid. Meahciráđđehus fuolahivččii dás duohkoge guovllu luonddu- ja soahtehistorjjálaš árvvuin.
Urho Kekkonen álbmotmeahcci lea galledanmeari dáfus Suoma nubbin bivnnuheamos álbmotmeahcci (334 700 galledeami jagi 2017). Eanaš oassi álbmotmeahci guosserávnnjiin johtet Suoločielggi bokte, gosa Meahciráđđehus čohkke boahttevuođas Suoločielgi-Gilonanoaivvi guovllu luondduguovddášdoaimma ovddideami. Sulaid 30 kilomehtera geažes Dávgevári luondduguovddážis gallededje jagi 2017 sulaid 8 800 vánddardeaddji, mii lea vuollel 3 % álbmotmeahci galledeaddjiin. Maiddái luondduguovddáža čájáhus lea oassái boarásmuvvan. Dál luondduguovddáža giddodaga nuppástusain lea mihttomearri bálvalit buorebut báikkálaš fitnodatdoalliid, Soađegili gieldda ja Dávgevári galledeaddjiid dárbbuid.
Urho Kekkonen álbmotmeahccái laktojuvvot evttohuvvon ng. Šuoma Ville guovlu rádjašuvvá dálážis álbmotmeahccái ja dat gullá dainna seammá Natura-guvlui. Eatnamat leat skáhppojuvvon stáhtii luonddusuodjalandárkkuhussii ja dat leat Meahciráđđehusa Luonddubálvalusaid hálddašeami vuolde. Šuoma Ville dállu lea duovdaga dáfus árvvolaš ja luonddutiippaid dáfus máŋggabealat buolžaguovlu Šuomajoga guoras ja dat dievasmahttá nu mearkkašahtti vugiin álbmotmeahci luondduárvvuid.
Ráddjennuppástusa guoskevaš láhkaevttohusnuppástus ja dan guoskevaš ráđđehusa evttohushámus kártamildosiiguin leat lohkanláhkái lausuntopalvelu.fi-palvelussa. Cealkámušaid bivdet 4.6.2018 rádjai.
Lassidieđut:
Hálddahusčálli Johanna Korpi, birasministeriija, t. 029 525 0278, ovdanamma.sohkanamma@ym.fi
Birasráđđeolmmoš Aulikki Alanen, birasministeriija, p. 029 525 0333, ovdanamma.sohkanamma @ym.fi
Guovllujođiheaddji Jyrki Tolonen, Meahciráđđehus, Luonddubálvalusat, t. 0205 647 640, ovdanamma.sohkanamma @metsa.fi