Birasministeriija ja Meahciráđđehus dieđihit 13.5.2020
Ordnen lea investeren luondduárvvuide, buresbirgejupmái ja barggolašvuhtii
Álbmotmehciid ja máŋggaid earáid bivnnuhis stáhta luonddusuodjalanguovlluid vánddardanbálvalusaid ordnejit dál viidát. Heajos ortnegis lean vánddardaninfrai čoggon ordnenvealgi geahpeduvvo mannan ja dán jagi 16 miljon euroin. Buorit vánddardanráhkadusat veahkehit lundui oahpásmuvvama, suddje hearkkes luonddu olbmo johtima stivremiin ja buorida čielgasit máŋgga luondduturismafitnodatdoalli doaibmaneavttuid.
– Eandalii dehálaš lea, ahte koronakriisa maŋŋá ekonomiija ođđasithuksen galgá leat suvdilis barggolašvuođa, luonddu máŋggahámatvuođa ja maiddái čitnaneutrálavuođa dáfus. Go investeret álbmotmehciid ja eará árvvolaš luonddučuozáhagaid divvunvealggi geahpedeapmái de investeret lundui, ekonomiijai ja olbmuid buresbirgejupmái. Buorre vánddardaninfra lea maiddái vástádus luondduturismaberoštupmái. Spiehkastatlaš áiggiin luondu addá fámu ja ráfi millii, dadjá biras- ja dálkkádatministtar Krista Mikkonen.
Stáhta bušeahttaruhtadeapmi luonddusuodjalanguovlofierpmádaga dikšumii lea dán jagi sturron čielgasit. Birasministeriija vuođđoruhtadeapmi Meahciráđđehusa Luonddubálvalusaide lovttai ovddit jagis 7,5 miljon euro, man lassin vánddardanbálvalusaid ordnemii ja ovddideapmái sihke luonddudiškumii, luonddudili ovddežin dikšumii ja luondduinvesteremiidda čujuhedje boahttevuođainvesterenruhtadeami 19,2 miljon euro. Dán jagi dahkkojuvvon bargguid maŋŋá čuozáhagaid vánddardaninfrai báhcá vel divvunvealgi nubbi 16 miljon euro, man figgat duohpat gitta lagašjagiid.
Barggolašvuođaávkkit oanehis ja guhkes áigegaskkas
Divvun- ja ordnenfidnuide oassálastá Meahciráđđehusa Luonddubálvalusaid iežas veahka ja eatnatlohkosaš smávva- ja gaskastuora fitnodagat birra Suoma. Divvunvealgeinvesteremat buvttadit oktiibuot árvvu mielde 190 olmmošbargojagi barggolašvuođa. Njuolggo barggolašvuođaváikkuhusat huksenbáikkiin leat sulaid 130 olmmošbargojagi. Lassin šaddá árvvu mielde 60 olmmošbargojagi eahpenjuolgga váikkuhusat huksema bálvalusain ja industriijas.
Divvunvealggi burgin ja galledeaddjiide čujuhuvvon bálvalusaid buorideapmi seailluhit galledeaddjiid beroštumi báikkiide. Dat dahká barggolašvuođavejolašvuođaid guovlluid bajásdoallamis ja áššehasbálvalusas. Barggolašvuođavejolašvuođaid fállet maiddái guovlluide mieigan fitnodagaid ođđa bálvalusat ja buktagat. Sturron jearru lasiha positiivva váikkuhusaid báikkálašekonomiijai ja dan bokte maiddái barggolašvuhtii earret eará bálvalanealáhusain oppalohkái.
“Dál dahkkojuvvon investeremat dorjot njuolgga koronakriisas gillán turismasektora ja buorit riikkavuložiid áhpásmuhttinvejolašvuođaid sierra guovlluin Suomas. Koronakriisa maŋŋá lundui mieigan ruovtturiikka turismma einnostit lassánit garrasit. Lagašáhpásmuhttinčuozáhagaid jearru lea koronaáigge lassánan garrasit. Dál dahkkojuvvon ja plánejuvvon investeremat lasihit ealáskahttima ja unnudit boahttevaš jagiid goluid”, gávnnaha luonddubálvalushoavda Timo Tanninen Meahciráđđehusas
Hearkkes luondu oažžu ávkki buori infras
Luonddusuodjalanguovlluid divvun- ja ordnenfidnuin guovddáš mihttomearrin lea suddjet hearkkes luonddučuozáhagaid gollamis ja hehttehusain seammás go dahkat vejolažžan suvdilis luonddudárkoma ja luonddueallámušaid dorvvolaš birrasis. Lea eandalii dehálaš, ahte luonddusuodjalanguovlluid vuođđun lean luondduárvvuid sáhttá seailluhit ja daid dili sáhttá buoridit seammás go galledeaddjiide čujuhit bálvalusaid. Maiddái birrasa suodjaleapmái galgá investeret. Bázahus- ja hivssetfuolaheami ráhkadusaid ja rusttegiid ordnen ja ođđaáigásažžan rievdadeapmi ja máđijaid nanosmahttin geahpedit čielgasit birrasa noađuheami.
Oppalaš galledeaddjimearri álbmotmehciin ja eará luonddubálvalusaid álbmotčuozáhagaid ledje jagi 2019 sulaid 8,2 miljon galledeami. Galledeaddjimeriid stuorrun Meahciráđđehusa čuozáhagain lea maŋimuš 5 jagi áigge leamaš sulaid 3 % jagis, mii jahkedásis lea oaivvildan 200 000 lassegalledeami.
Hossa álbmotmeahci buorit vánddardanbálvalusat álkidahttet buohkaid johtima máđijain. Govva Jonna Kalliomäki.
Guvllolaš ovdamearkkaid vánddardaninfra buorideamis sáhttá jearrat vulobeale Meahciráđđehusa Luonddubálvalusaid guovlluhoavddain.
Lassidieđut:
Ministtar Mikkosa sierraveahkki Antti Heikkinen, tel. 050 348 1406
Meahciráđđehus, luonddubálvalushoavda Timo Tanninen, tel. 040 661 0033
Rehkenastimat divvunvealggis ja barggolašvuođaváikkuhusain: Meahciráđđehus, luonddu áhpásmuhttin- ja turismaávkkástallama oaivámuš Sakari Kokkonen, 0400 241 411
Meahciráđđhusa Luonddubálvalusaid guovlluhoavddat:
Riddu (Vaasa-Kotka -riddoguovlu ja OG-guovlu): Henrik Jansson, 0400 328 759
Jávre-Suopma: Jouni Aarnio, 040 735 2804
Davvebađaeana-Kainuu: Pirkko Siikamäki, 040 735 2804
Lappi: Pirjo Seurujärvi, 0400 125 782