Suoma, Ruoŧa ja Norgga oktasaš hui áittavullosaš njála suodjalanprošeakta oaččui joatkkaruhtadeami Eurohpá guovlluovddidanruhtarájus. Davviguovlluid njála veahkeheami bastit joatkit lassebiebmamiin ja njála gilvvohalli šlája, riebana meahcástemiin. Lassin Norggas dahket maiddái njála sirdimiid.
Felles Fjellrev Nord II lea njuolgga joatkka mannan jagi nohkan suodjalanprošektii, ja dahkkojuvvon doaimmat leat oassái seammá go árabut buorrin vásihuvvon doaimmat. Daid lassin ruoŧŧelaš njálaide leat bidjan ealli heađuškeahtes satellihttasáddenbiergasiid. Daiguin oažžut dehálaš dieđu njálaid lihkadeamis suodjalanbarggu duogášdiehtun.
Eallit eai dieđe riikkarájáin, nuba fidnus háliidit maiddái dahkat ain buoret oktavuođaid Guoládatnjárgii, ja oažžut sodjalanvirgeoapmahaččaid ja dutkiid mielde bures lihkostuvvan davviriikalaš ovttasbargui njála suodjaleapmin.
Prošeavtta jođiha Norrbottena leanastivrra ja Ruoŧas mielde lea maiddái Stockholmma universiteahtta. Suomas guoibmin lea Meahciráđđehusa Luonddubálvalusat, Norggas dutkanlágádus NINA ja Romssa universiteahtta. Váldoruhtadeaddjin lea Eurohpá guovlluovddidanruhtarádju Interreg Davvi -prográmma.
WWF vuođđudii njállabargojoavkku Supmii
Suomas njála bessema eai leat gávnnahan badjel 20 jahkái. Bessema vuorddehahttivuohta lea goittotge sturron, go njállanálit leat lassánan Ruoŧas ja Norggas. Go njálla sáhttá vel máhccat Supmii lagašjagiin, WWF vuođđudii álgojagis bargojoavkku koordineret šlája suodjalan- ja dutkanbarggu. Bargojoavkku sátnejođiheaddji lea meahccediehtaga professor Heikki Henttonen, ja bargojoavkkus lea meahciráđđehusa ja WWF:a lassin mielde njála čuovvuma ja suodjalanbargguid geavatlaččat bargan olbmot.
– Njála suodjaleapmi ja dutkamuš gáibidit lávga riikkaidgaskasaš ovttasbarggu, ja dás Meahciráđđehusa Luonddubálvalusain ja WWF:a vuođđudan bargojoavkkus lea guovddáš rolla, Heikki Henttonen dadjá.
Bargojoavkku vuosttas mihttomearrin lea lasihit njála biebmanautomáhtaid ja fuođđokámeraid Suoma Sámis. Duottarguovlluide árabut stellejuvvon kámerain leat ožžon earenoamáš dehálaš dieđuid Suoma njálladilis.
Davvi njállanáli leat lihkostuvvan oažžut lassánit 2000-logus, ja dat roahkasmahttá barggu. Olles Skandinávias njálat leat sulaid 350, ja mannan gease áice juobe 98 njála bessema. Dálkkádaga liegganeapmi ja duottarjalgadasa gáržun leat goittotge stuorra áitagat náli ceavzimii.
Lassidieđut:
Meahciráđđehusa Luonddubálvalusat, alladárkkisteaddji Tuomo Ollila, tel. 0400 241448
WWF, prográmmaoaivámuš Petteri Tolvanen, tel. 0400 168939