Ođasmahtton Guivvi luonddumeahcis lea vuosttas Meahciráđđehusa Luonddubálvalusaid stohpu luonddusuodjalanguovllus, mas vánddardanstohpu ja boazodoalliid anus lean fuolahanstohpu leat seammá visttis. Guivvi ávdinstobu virggálaš rahpandoalut ledje ikte Ohcejogas.
Guivvi ávdinstohpu lei geavahangealbbohis ortnegis, man dihtii guvlui háliidedje hukset ođđa stobu. Bálggus oassálasttii stobu huksengoluide. Dat oasistis sihkkarasttii stobu huksema ja veahkehii vistti doaimmaid plánemis.
– Midjiide lea fiinna ášši, ahte ođasmahtton Guivvi stohpu bálvala dál guovtti earálágan ávkkástallanjoavkku. Anan stuorra árvvus bálgosa ovdagáttohis álgaga ovttasbarggus, álbmotmeahccehoavda dadjá Pirjo Seurujärvi Meahciráđđehusa Luonddubálvalusain.
Báišduoddara bálggus lea Guivvi ávdinstobus láigolažžan. Stobu nubbi latnja lea lohkkaduvvon ja čoavdagat leat badjeolbmuin.
– Mis leamašan jo guhkká plána, ahte deike guovdu bálgosa dárbbašivččii bartta boazodoalu dárbbuide. Nuba fuobmáimet evttohit Meahciráđđehussii ovttasbarggu go gulaimet ođđa ávdinstobu plánain, boazoisit Ari-Heikki Aikio muitala.
Bázahuslihtit jávket giđa áigge Geavus, luonddumeahcis boahtá ruskkahis vánddardančuozáhat
Giđđadálvvi áigge Geavu luonddumeahcis šaddá ruskkahis vánddardančuozáhat. Meahciráđđehusa Luonddubálvalusat jávkada bázahusčuoggáid dálvefuolahanreaissuid oktavuođas.
– Dan maid nagodat fievrridit lundui, nagodat maiddái fievrridit eret. Dát viidát eará Lappi vánddardančuozáhagain jo anus lean prinsihppa lea dál láidesteaddjin maiddái Geavus. Bázahusaid fievrrideamis leat šaddan midjiide dušši goasttádusat, ja ruskalihtit jo daninassii movttiidahttet olbmuid guođđit bázahusaid luonddumeahccái vánddardettiin, Pirjo Seurujärvi muitala.
Bázahusčuoggát leat Geavu máđidja vuolginbáikkiin Suttesjogas ja Ganešjávrris.
Vánddardeaddji ohcá Geavus eanadagaid, jaskatvuođa ja buhtes luonddu
Geavu luonddumeahcis vánddardeaddji sáhttá vásihit Lappi luonddu rámššasvuođa. Luonddumeahcis lea badjel 40 kilomehtera guhkes ja báikkuid measta 80 mehtera čiekŋalis ávželeahki, man botnis golgá Geavvu.
Vánddardeaddjái leat guokte merkejuvvon ja viehka gáibideaddji vánddardanmáđija. Guivvi ávdinstohpu lea vánddardanmáđijaid guoras. Luonddumeahcit leat álbmotmehciid čavgadut suodjaluvvon luonddusuodjalanguovllut. Geavatlaččat dát oaivvilda, ahte lihkadeapmi Geavus geasseáigge lea lobálaš dušše merkejuvvon máđidja mielde, vai Geavu ávži ja dan birrasa duottarluondu seailu. Dálvit sáhttá lihkadit friddjabut.
– Galledeaddjidutkamuša mielde báikkis fitnan vánddardeaddjit leamašan duđavaččat luonddumeahcis lean bálvalusaide ja birrasa luondu lea deavdán sin vuordámušaid. Deháleamos sivat Gevvui boahtimii leat eanadagat, luonddu vásiheapmi, beassat leat eret šlámas ja nuskkiin, muossáneapmi ja vuoiŋŋalaš buresveadjin, Seurujärvi muitala.
Geavu luonddumeahcis ledje mannan jagi badjelaš 4 600 galledeami. Koronajagi galledeamit ledje historjjálaš olu, measta 8200 galledeami. Gaskamearálaš galledeami bistin luonddumeahcis lei njeallje jándora.
Lassedieđut:
Luonddubálvalusat: álbmotmeahccehoavda Pirjo Seurujärvi t. 040 012 5782
šleađgapoasta hámis: ovdanamma.sohkanamma@metsa.fi
Báišduoddara bálggus: Boazoisit Ari-Heikki Aikio t. 040 843 2749
Geavu luonddumeahcci (lundui.fi)
Guivvi ávdinstohpu (lundui.fi)