Reppuretki.fi ja Máttanuorta-Suoma ámmátallaskuvlla vánddardeaddjit čogge Muotkkeduoddara meahcceguovllus Anáris ja Ohcejogas giđa beaivve áigge 600 lihttera lundui guđđojuvvon ruskkaid. Riikkaidgaskasaš čorgenbeaivi movttiidahtii dán.
47 vánddardeaddji Máttanuorta-Suoma ámmátallaskuvllas báhkkejedje ruskaseahkaid rehpuideaset go vulge meahccái. Guđa beaivve vánddardeamis sii vázze oktiibuot sulaid 500 kilomehtera ja čogge Muotkkeduoddara meahcceguovllus ruskkaid, maid vánddardeaddjit, guolásteaddjit ja meahcásteaddjit leat guođđán.
Guovllus gávdnojedje earret eará seaillu- ja vuollaburkket, folio, lássaboahtalat ja plastihkat. Stuorámus eret fievrriduvvon bierggas lei hilgojuvvo lávvoloavdda ja unnimus ruovdevuogga. Ruskkat čoggojedje máŋga bázahusseahka dievva ja lihtterat buohkanassii 600. Meahciráđđehusa Lappi Luonddubálvalusat vižže ruskkaid bázahusaid gieđahallama várás.
– Leat min oahppiiguin vánddardan Muotkkeduoddaris jahkelogiid áigge. Háliidat boahttevuođasge beassat návddašit buhtes luonddus. Dán sivas ávžžuhatge earáid vánddardeaddjiid oassálastit eaktodáhtolaš čorgemii vánddardanguovlluin ja álbmotmehciin, muitala lektor Tommi Pantzar Máttanuorta-Suoma ámmátallaskuvllas.
– Lean johtán Muotkeduoddaris badjel 25 jagi áigge, guovllu lea munnje hui lagaš, muitala Muotkkeduoddara čorgendáhpáhussii oassálastán meahcceofelaš Olli Järvenkylä Reppuretki.fi:s.
– Ruskkaid čoggoma ovddalgihtii eastadeami gánneha álggahit jo ovdal vánddardeami. Guođe joavdelas báhkkenmateriálaid eret, geavat dušše bistevaš lihtiid dahje- seahkaid, ávžžuha Järvenkylä.
World Cleanup Day čohkkii olbmuir miehtá máilmmi doaibmat ovttas buhtes birrasa beales. Birrasa čorgejedje seammá áigge 150 riikkas.
Lassidieđut:
Muotkkeduottar lea okta riikamet guovttenuppelogi meahcceguovllus. Meahcceguovllut leat viidát, ásakeahtes guovlluid geainnuid duohken. Muotkkeduoddara meahcceguovlu lea meahcceguovlluin buot eanemus meahccelágan: eai leat merkejuvvon máđijat ja ávdinstobut leat unnán.
- Muotkkeduoddara meahcceguovlu (www.lundui.fi/muotkkeduottar)
- Ruskkahis vánddardeapmi (http://www.lundui.fi ribahisvanddardeapmi)
- Reppuretki-siiddut (www.reppuretki.fi)