Bállás-Ylläsduoddara álbmotmeahccái lea gárvánan ođđa dálkkádatviissis turismaplána, mas turisma ovddideami stivrejit dálkkádatboahttevuođat ja konkrehtalaš vuogáiduvvandoaimmat. Gažaldagas lea vuosttamuš álbmotmeahci turismaplána Suomas, mas dálkkádatnuppástus lea váldon plánema vuolggasadjin.
Bállás-Ylläsduoddara álbmotmeahcci lea Suoma bivnnuhamos álbmotmeahcci. Lassáneaddji galledeaddjimearit ja nuppástuvvi dálkedilit ásahit ođđa gáibádusaid luonddusuodjaleapmái, turismii ja álbmotmeahci bálvalanráhkadusaide. Turismma ovddideamis galgá vuhtiiváldit dálkkádatnuppástusa buorebut go árabut, dasgo oanehut dálvvit, guhkit geasit ja dálkki ravdaihtagiid lassáneapmi váikkuhit sihke lundui ja turismma eavttuide. Dálkkádatnuppástusa ja lassáneaddji galledeaddjimeari váikkuhusat oidnojit jo álbmotmeahci luonddus.
“Dálkkádatnuppástus nuppástuhttá álbmotmehciid diliid johtilit. Danin turismma galgá ovddidit gillilit ja ávaštallamiin, ovttasbarggus guovllu turismadoibmiiguin”, dadjá Clap-fidnu prošeaktahoavda Heidi Siira Meahciráđđehusa Luonddubálvalusain.
Turismaplánas lea atnon ávkin ávaštallama meannudanvugiid ja guovtti molssaevttolaš dálkkádatboahttevuođa. Daid vuođul lea gárvvistuvvon luondduturismasenáriot bievlla ja muohttaga áigge turismii jagi 2050 rádjái. Plána dievasmahttá Bállás–Ylläsduoddara álbmotmeahci dikšun- ja geavahanplána ja fállá oktasaš rámma suvdilis turismii. Turismaplána lea oassi davviriikalaš Clap-fidnus.
Guovddáš oassi turismaplánas lea vuogáiduvvanplána, mii čohkke geavatlaš doaibmabijuid turismma, johtolagaid, ráhkadusaid ja dieđiheami ovddideapmái nuppástuvvi diliin. Ovddidit johtolagaid ja ráhkadusaid plánema gierdat lassánan arvemeari, gollama ja molsašuddi dálvediliid ja stivret lihkadeami áigemuttu dahje čuozáhaga, jos luondu dahje dorvvolašvuohta dan gáibida. Lassin ráhkadit muohttagis sorjjasmeahttun bálvalusaid álbmotmeahccái.
Turismma mearkkašupmi Bállás–Ylläsduoddara guvlui lea fuomášahtti. Jagi 2024 álbmotmeahci turismma ollislašváikkuhus lei 71,5 miljovnna euro ja barggolašvuođaváikkuhus 553 olmmošbargojagi. Ođđa turismaplána mihttomearrin lea, ahte turisma doarju báikkálašekonomiija maiddái boahttevuođas, muhto ii áitte álbmotmeahci luondduárvvuid.
Turismaplána almmustahtto luonddueahkedis dáhpáhus- ja kongreassaguovddáš Levi Summitis vuossárgga 23.3.2026. Luonddueahkeda váldohállin lea Kimmo Ohtonheimo. Prográmma ja lassediehtu: Turisma ja nuppástuvvi dálkkádat – Bállás-Ylläsduoddara álbmotmeahci boahttevuohta – Lundui
Turismaplána ja luonddueahket leat oassi Clap-fidnu dahjege Climate change communication and adaptation in Arctic protected areas (2024-2026). Fidnu ruhtaduvvo EU Interreg Aurora -prográmmas.
Lassedieđut
- Meahciráđđehus, prošeaktaoaivámuš Heidi Siira, tel. 040 673 7583, heidi.siira@metsa.fi
- Bállás–Ylläsduoddara álbmotmeahci dálkkádatviissis turismaplána (julkaisut.metsa.fi)
- Pohjoismainen CLAP-hanke: Ilmastonmuutokseen varautumista yhteistyössä pohjoisilla suojelualueilla (4.6.2024)
- Bállás-Ylläsduoddara álbmotmeahcci (luontoon.fi)
