Meahciráđđehus lea mearridan ráddjet Gálggooaivveluotta geavaheapmi Eanodagas. Geainnu álgui ceggejuvvojit čakčat 2026 gielddus- ja ráddjehusmearkkat, maid mielde mohtorfievrruiguin johttin luottas gáibida boahttevuođas Meahciráđđehusa mieđihan miehtama.
Sáhka ii leat luotta giddemis, muhto dan geavaheami stivremis ja ráddjemis. Nuppástusa mihttomearrin lea dorvvastit guovllu luondduárvvuid, luondduealáhusaid doaibmaeavttuid, kulturárbečuozáhagaid ja meahcceguovloluonddu seailuma maiddái boahttevuođas.
Maŋimuš jagiid Gálggoaivveluotta beaggin lea lassánan earret eará sosiála media, neahttaalmmustahttimiid sihke meahcce- ja fearánturismma gieđahallan sisdoaluid bakte. Seammás guovllus dáhpáhuvvan mohtorjohtalus lea lassánan. Lassánan geavaheapmi čuohcá hearkkes lundui, luondduealáhusaide ja guovllus áhpásmahttinatnui. Eatnama gollan, hehttehusváikkuhusat ja sierra geavahanvugiid oktiiheiveheami dárbbut leat lasihan dárbbu johtalusa stivremii.
Gálggoaivveluodda lea bázahas guovllu soahtehistorjjálaš áiggis. Geaidnu dahkkojuvvui nuppi máilmmisoađi áigge, ja dat laktása bealuštan- ja fuolahanvuogádagaide, maid duiskalaččat ollahuhtte Sámis. Geainnu ortnet lea hedjonan jagiid áigge čielgasit, heajos ortnet mielddisbuktá riskkaid dan geavaheaddjiide ja lihkadeapmi gáibida earenoamáš várrogasvuođa. Geaidnu bajásdollui ja divvojuvvui vel Muonnjagoržži rádjegozáhusstašuvnna doaimma áigge 1990-logu rádjai. Rádjegozáhusstašuvnna doaimma nogadettiin luddii ii leat leamašan šat dakkár geavahandárbu, mii livččii gáibidan geainnu fuolaheami doaimmaid. Maiddái Meahciráđđehusa dálá doaibma guovllus ii gáibit geainnu bajásdoalu dahje divvuma.
Mohtorfievrojohtalus gáibida boahttevuođas miehtama
Meahciráđđehus árvvoštallá ohcamušas dáhpáhusaid mielde mohtorfievrojohtalusa dárbbu ja váikkuhusaid, sihke sihkkarastá, ahte guovllu geavaheapmi lea vuogálaš ja heive oktii eará geavahanvugiiguin.
Miehtan sáhttá mieđihuvvot ovdamearkan luondduealáhusaid hárjeheapmái, dutkandoibmii, ealgga ja guovžža bivddus ožžojuvvon sállaša fievrrideapmái meahcis ja báikkálaččaide luonddu ávkkástallamii. Miehtan mieđihuvvo dáhpáhusaid bokte vihkkehallama vuođul. Vihkkehallamis váldojuvvo vuhtii vuodjima ulbmil, luondduealáhusaid doaibmaeavttut, kulturárbeárvvut ja earát guovllu geavahanhámit.
Nuppástus guoská dušše mohtorfievrojohtalusa. Lihkadeapmi buohkaidrivttiid vuođul joatkašuvvá dego ovdal. Nuppástus boahtá fápmui golggotmánus 2026.
Lassedieđut:
Meahciráđđehus, Eanageavahanáššedovdi Marika Koskiniemi, 040 121 7079, marika.koskiniemi@metsa.fi