Meahciráđđehusa Luonddubálvalusat geahččala ođđalágan nanusmahttima Urho Kekkonen álbmotmeahcis mii lea bivnnuhis meahccesihkkelastiid gaskkas. Ceakkus Niilanpää–Rautulampi gaskii áigot nanusmahttit buohkaide álbmotmeahcis lihkadeaddjiide oaivvilduvvon geinnodaga, mii mohkohallá dáláš geinnodaga guktuid beale. Mihttomearrin lea eastit luonddu gollamis ja buoridit dorvvolašvuođa.
Helikopterfievrrideamit ráddjejit lihkadeami Niilanpää guovllus 16.8 rájes
Ođđa, mohkohalli geinnodat buhtte sullii 2,5 kilomehtera mátkkis boares geinnodaga. Geinnodaga huksen meahccái álgá odne vuossárgga 7.8.
Meahccái fievrridit čievrra helikopteriin gaskavahku 16.8 rájes. Helikoptergirdimiid áigge čuovvovaš geinnodagat leat dorvvolašvuođasivaid dihtii gitta: Kiilopää–Niilanpää, Kiiloselkä–Niilanpää ja Niilanpää–Rautulampi. Maiddái buot lihkadeapmi rukses guovllus mii oidno kárttas lea helikopterfievrridemiid áigge gildojuvvon.
Čievrra fievrridit meahccái helikopteriin, dasgo fievrridanvuohki ii golat luonddu seammá láhkai go ovdamearkka dihtii čievrafievrrideamit mat dahkkojuvvojit tráktoriin.
Nanusmahttima gollomeroštallan lea 150 000 euro. Bargu lea ožžon sierraruhtadeami stáhta lassebušeahtas.
Meahccesihkkelastingeinnodagaid meari ii leat oaivilin lasihit Urho Kekkonen álbmotmeahcis
Urho Kekkonen álbmotmeahccái dahket olu tuvrraid meahccesihkkeliiguin. Sihkkelastit leat sullii 15 proseantta vánddardeaddjiin, geat vulget Kiilopää vuolggapoarttas álbmotmeahccái. Geasi 2022 áigge Kiilopääs ledje álbmotmeahccái sullii 10 000 sihkkelastintuvrra.
Dábálaččat Rautulampi guvlui sihkkelastigohtet justa Kiilopääs. Niilanpää–Rautulampi gaska lea meahccesihkkelastiid gaskkas bivnnuhis, ceakkus geinnodat. Ceakkusvuohta dagaha garra dillefárttaid ja várálaš dáhpáhusaid.
Bálggis lea maiddái leavvan ja birastahtti luondu gollan, dasgo lihkadeaddjit garvet ja ohcet heivvolaš johtinsaji duoddaris.
– Dáláš geinnodat lea johtán tráktoriidda ja njealjejuvllagiidda oaivvilduvvon fuolahusluotta mielde ja johtán viehka njuolga mearrebáikái. Min mihttomearrin lea, ahte ođđasit linnjejuvvon, mohkohalli geinnodat ii leat mange sajis ná ceakkus. Ná čáhci ii doalvvo čievrra fárustis ja geinnodat galggašii gierdat buorebut áiggi. Mohkohalli, njoidosut geinnodat geahpeda maiddái sihkkelastiid dillefárttaid, dadjá áhpásmuhttingeavaheami áššedovdi Petri Kulha Meahciráđđehusa Luonddubálvalusain.
Oahput ođđa vuohkái dahkat leat boahtán Eurohpás Álppain, gos ceakkus eatnamiin lihkadit olu meahccesihkkelastit.
– Mii háliidit dahkat juo gárvvis geinnodagas dakkáraš vásáhusa, ahte geinnodagas ii leat dárbu spiehkkasit dego dál. Meahccesihkkelastingeinnodagaid meari ii baicce leat oaivilin lasihit álbmotmeahcis, Kulha dadjá.
Meahciráđđehusa Luonddubálvalusat dikšu ja ovddida álbmotmehciid Suomas. Álbmotmeahci dikšun- ja geavahanplána meroštallá, maid guovlluide álbmotmeahcis čujuhit áhpásmuhttingeavaheami dahje ođđa geinnodagaid ja maid guovlluid suodjalit dárkilit.
Lassedieđut:
Áhpásmuhttingeavaheami áššedovdi Petri Kulha,
tel. 020 6394 350, šleađgapoasta hámis: ovdanamma.sohanamma@metsa.fi