Bátneduoddara meahcceguovllus Avviljoga ja Gáretjoga guovlluin čogge luonddudieđu golmma geasi áigge. Kártenbarggu mihttomearrin lei dievasmahttit dieđuid earenoamážit Natura 2000 -guovllu luonddutiippain ja šlájain mat leat suodjaleami ággán. Kártemiin ožžo valjis dieđu guovlu vuvddiin, jekkiin ja johgáttiin. Avviljohka Bátneduoddara meahcceguovllus lea rohtonárvva deháleamos dihttonguovlu Suomas.
Meahciráđđehusa Lappi Luonddubálvalusaid luonddukártejeaddjit inventerejedje luonddutiippaid ja šaddošlájaid golmma geasi áigge Avviljoga golleguovllus Bátneduoddara meahcceguovllus. Dieđu čogge earenoamážit johka- ja ájaguoraid luonddutiippain. Avviljoga gáttiin inventerejedje hárvenaš dulvevuvddiid ja -niittuid.
– Inventeremiin olu luonddutiippaid, maid ii sáhte áicat meahccebarggu haga. Inventeremiin gávdnui ee. ritnesámelgáldu, mii lea hui hárvenaš luonddutiipa Bátneduoddara meahcceguovllus. Meahcceguovllus leat olu gáldut ja gáldoádjagat, luonddusuodjaleami sierraáššedovdi Saara Tynys Meahciráđđehusas muitala.
Geassit 2022 inventerejedje Gáretjoga sullii 25 kilomehtera mátkkis Bátnejávrri ja Ádjájávrri gaskkas. Gáretjohka lea dolin roggojuvvon dimbariid vuojaheami várás ja guovllus leat vuojaheapmái gullevaš boares ráhkadusat. Viehka guorbbas johkaguoras šaddet boares beahcevuovddit ja duvttahis jeakkit, muhto báikkohagaid leat maiddái šattolaš jeakkit dego čáhcejeakkit.
Avviljogas vudjo kártet rohtonárvva, mii lea čuovvuma vuollásaš šládja (Moehringia lateriflora), man measta buot dihttonsajiid dárkkistedje golmma geasi áigge. Rohtonárvi gávdnui valjis Avviljohkii golgi Kyläjoki gáttiin. Rohtonárva šaddá Davvi-Sámis dušše beare Avviljoga guovllus. Gáretjogas áice moatte sajis uhcafiskesrási (Ranunculus lapponicus). Geassit 2019 inventerejedje maiddái hárvenaš sámmáliid ja meahcceguovllus gávdnojedje ee. áitatvuloš polargisttasámil (Scapania spitzbergensis) ja guottolávžesámil (Crossocalys hellerianus).
Luondduinventeremat ledje dárbbašlaččat, dasgo diehtu guovllu luonddutiippain lei boarásmuvvan. Áigeguovdilis luonddudieđu Bátneduoddara meahcceguovllus dárbbaša eanangeavaheami, dego golleohcama stivremii, vai luonddutiippaid ja šlájaid seailuma sáhttá dorvvastit buoremus vejolaš vugiin. Dárbbašit lasi dieđu luonddus dáhpáhuvvan nuppástusaid čuovvumii. Čoggojuvvon luonddudieđu sáhttá geavahit maiddái rávdnječáziid ovddežiiddikšunplánemis.
- Bátneduoddara meahcceguovllu Natura 2000 -guovlu: suodjaleami ággán 17 luonddutiippa ja 7 šlája, dego luondduvuovddit, dulvevuovddit ja gáldut ja gáldoádjagat, rohtonárva, uhcafiskesrássi ja jeaggenarti
- Bátneduoddara meahcceguovlu (luontoon.fi)
- luonddutiippat: Meahciráđđehusa luonddubálvalusaid rabas báikediehtu
- šlájat: šládjaáicamat Laji.fi
Eurohpá uniovdna ruhtadeaddjin
Inventeremat gullet Davvi jogaid ekologalaš ordnen -fidnui (2019-2022), mii gullá EU olgorádjáovttasbargoprográmmii (ENI Kolarctic CBC). Čuozáhatguovlun leat Suoma, Ruoŧa ja Norgga davimus oasit. Fidnus ovddidit ee. rávdnječáziid inventerenvugiid, dahkat divodanplánaid ja divodit rávdnječáziid. Suomas fidnus leat mielde Meahciráđđehusa Luonddubálvalusat ja Lappi EBI-guovddáš.
Lassedieđut:
Luonddusuodjaleami sierraáššedovdi Saara Tynys, Meahciráđđehus, Lappi Luonddubálvalusat: 0400 195 082, saara.tynys@metsa.fi
Luonddusuodjaleami sierraáššedovdi Anna Tammilehto, Meahciráđđehus, Lappi Luonddubálvalusat: 040 193 1861, anna.tammilehto@metsa.fi