Jagi 2026 álggus álgá meahccejohtalusa golmmajahkásaš dihtoearrebadji. Buot mohtorgielkávuoddjit, geat vudjet stáhta eatnamiin dahje Meahciráđđehusa gielkáluottain, galget ohcat ođđa meahccejohtaluslobiid. Dát guoská sihke priváhtta vuodjimii ja mátkeealáhusfitnodatdoibmii. Meahciráđđehusa lohpi ii dárbbašuvvo, juos vuodjá virggálaš meahccejohtalusmáđijain dahje servviid dahje priváhtta luottain.
Meahccejohtalustlobiid ohcanáigi fitnodatdoaimma várás lea dál rabas Eräluvat.fis: https://www.eraluvat.fi/se/meahccejohtalus
– Áššehasat sáhttet dál ohcat čuovvovaš dihtoearrebaji meahccejohtaluslobiid. Maiddái safári-ja reahkafievrredanfitnodagat galget ohcat ođđa dihtoearrebaji mielde eananeaiggáda miehtama fitnodatdoaibmii ovddalgihtii, muittuha bálvalusoamasteaddji Elina Odé Meahciráđđehusa Luonddubálvalusain.
Safárifitnodagaide miehtamat ja almmuhusat
Safárifitnodagat galget ohcat ođđa eananeaiggátmiehtama safáridoibmii Meahciráđđehusa gielká- ja fitnodatluottaide ja maiddái oahpisteaddjiide galgá ohcat meahccejohtaluslobi sierra guđege vuoddjái, juos fitnodat fállá reahkafievrredeami. Miehtama sáhttá álkit ohcat Eräluvat.fi-bálvalusa skoviin. Ođđa gáibádus lea, ahte ohcamuššii galgá laktit Tukesa rávvagiid mielde dorvvolašvuođaduođašteami (tukes.fi, suomagillii).
Reahkafievrredeami lohpepraktihkka rievdá
Jagi 2026 rájes ii sáhte šat hárjehit gávppálaš reahkafievrredandoaimma Eanodagas, Anáris ja Ohcejogas báikkálaččaid persovnnalaš meahccejohtaluslobiiguin, mat leat oaivvilduvvon dušše priváhtta geavahussii. Motoriserejuvvon fitnodatdoaibma stáhta eatnamiin eaktuda dás duohko olles Suomas eananeaiggáda miehtama dahje soahpamuša ja maiddái meahccejohtaluslobi. Oahpisteaddjiid lobit leat nuvttá sidjiide, geat vudjet ruovttugielddas ja máksinvuložat sidjiide, geat leat eret eará báikkiin.
Iešheanalaš gielkávuoddjit ja ruovttugielddas vuoddjit
Iešheanalaš gielkávuoddjit sáhttet oastit luoddalobiid ođđa dihtoearrebadjái 1.1.2026 rájes Eräluvat.fi-neahttagávppis. Maiddái ruovttugielddaineaset vuoddji gielkávuoddjit galget ohcat ođđa meahccejohtaluslobi Meahciráđđehusas. Lohpi lea persovnnalaš iige atte rievtti fitnodatdoibmii. Lohpevuovdin álggahuvvo árabut, juos muohtadilli dan suovvá.
Vuodjin lea lobálaš dušše rahppojuvvon luottain, luottat rahppojuvvojit muohtadili mielde. Luottaid rahpanáiggiid sáhttá dárkkistit eraluvat.fi-siidduin.
Lassidieđut
- Meahccejohtalusa bálvalusoamasteaddji Elina Odé, Meahciráđđehus Luonddubálvalusat, elina.ode@metsa.fi, tlf. 040 632 8408
- Ohcamii laktáseaddji oktavuođaváldimat: maastoliikenneluvat@metsa.fi
- https://www.eraluvat.fi/se/meahccejohtalus