Sämmilij tuotâvuotâ- já sovâdâttâmkomissio luovâttij loppâraportis 4.12.2025. Meccihaldâttâs kijttá komissio pargoost sämmilij sajadâhân já vuoigâdvuođáid čuoccâm luávkkáámij čielgiimist, já lii kiärgus juátkiđ pargo oovtâstpargo pyeredem várás.
”Lii tehálâš, et historjáliih epivuoigâliih tileh pajeduvvojeh uáinusân, vâi tain puáhtá savâstâllâđ ávus vuovvijn já sooppâđ tooimâin, moiguin sämmilij sajadâh nanoduvvoo. Čuávuvâžžân parlamentarlâš pargojuávkku árvuštâl komissio avžuuttâsâid já vuáváá jotkâtooimâid. Meccihaldâttâs lii pelestis kiärgus tuárjuđ pargojuávhu pargo já ovdediđ vuárusavâstâllâm”, Meccihaldâttâs uáivihovdâ Juha S. Niemelä iätá.
Sämmilij päikkikuávlust paijeel 90 % láá Meccihaldâttâs haaldust leijee staatâ enâmeh. Meccihaldâttâs pargon lii tipšođ, kevttiđ já suojâliđ jieijâs haaldust leijee luánduriggoduvâid toin naalijn, et sämmilii kulttuur hárjuttem máhđulâšvuođah torvejuvvojeh. Sämmilij vuoigâdvuotâ paijeentoollâđ já ovdediđ jieijâs kielâ já kulttuur ovdeduvvoo sopâmuš- já ráđádâllâmmonâttâlmijguin sehe tuárjumáin sämikielâlii viestâdem já kulttuurhaavâid.
”Oovtâstpargo Meccihaldâttâs já sämisiärváduv kooskâst lii ovdedum iheluuvij ääigi, já táálááh oovtâstpargovuáválâšvuođah láá uáli luávdeeh já tuáimeeh. Mii vuárusavâstâllâm sämisiärváduv ovdâsteijeiguin lii nanos. Mij anneep tom eromâš tehálâžžân já mávsulâžžân, já halijdep pyerediđ oovtâstpargo ain-uv”, Niemelä iätá.
Meccihaldâttâs tooimâid sämmilij päikkikuávlust stivree kuávlu luánduriggodâhvuávám, mii lii rahtum oovtâstpargoost sämisiärváduvváin já kuávlu čonâsjuávhuiguin. Ton lasseen kiävtust láá eres oovtâstpargosopâmušah já OA biodiversitetsopâmušân vuáđuduvvee Akwé: Kon -toimâmmalli eennâmkevttim prosesijn.
Meccihaldâttâs ij olášut sämmilij päikkikuávlust čuopâdâsâid tâi eres meccituálutooimâid palgâsij mietâmušttáá. Luánduriggodâhvuáváámist lii meid linjejum, et Meccihaldâttâs ij oovded kuávlust pieggâvyeimihaavâid vuávámpaje ääigi. Puoh eennâmkevttimân lohtâseijee vuáváámijn ráđádâlloo sämitiggijn já nuorttâlij sijdâčuákkimáin. Meccihaldâttâs uárnee táárbu mield sämitiggelaavâ 9 §, puásuituálulaavâ 53 § já nuorttâlâšlaavâ 56 § miäldásijd kulâmijd.
Meccihaldâttâs ulmen lii nanodiđ jieijâs pargovievâ tiäđuid já ibárdâs sämmilij kulttuurist já vuoigâdvuođâin, já tađe várás pargoviehân lii uárnejum škovlim. Eromâšávt sämmilij päikkikuávlust tâi sämiašijguin pargeeh movtijdittojeh oppâđ sämikielâid. Rekrytistmist annoo áárvust sämikielâ já kulttuur mättim pargokuvij miäldásávt. Tuotâvuođâlii oovtâviärdásâšvuođâ visásmittem várás puáhtá táárbu mield kevttiđ rekrytistemtilálâšvuođâst meid positivlii sierânâskohtâlem.
Lasetiäđuh: uáivihovdâ Juha S. Niemelä, Meccihaldâttâs, p. 050 500 3681, ovdânommâ.suhânommâ@metsa.fi
