Meahciráđđehusa Luonddubálvalusat leat gilvalahttigoahtán vánddardančuozáhagaid boaldenmuorrafuolahusaid, bázahusfuolahusaid ja bajásdoallanfuolahusaid muhtin vánddardančuozáhagain Lappis, Kuhmo vánddardančuozáhagain ja Kurjenrahka álbmotmeahcis Varsinais-Suomis.
Fuolahusbálvalusaid háhkan buktá fitnodatdoalliide dinenvejolašvuođaid, doarju báikkálašekonomiija ja lea goasttádusaid dáfus beaktilis vuohki bajásdoallat vánddardančuozáhagaid. Fuolahusfitnodatdoallit ohccojuvvojit dál jagi 2026 álggu rájes čuovvovaš guovlluide:
Lappi
- Miekojärvi ja lagašguovlu (Pello)
- Meltausjoki (Roavvenjárga)
- Roavvenjárgga ja Ylitornio ovttaskas vánddardančuozáhagat
- Martimoaapa (Simo)
- Avviljohka ja Soahtejohka (Anár)
Nuorta-Suopma
- Kuhmo vánddardančuozáhagat
Varsinais-Suomi
- Kurjenrahka álbmotmeahcci
Bosihanbáikkiid fuolaheamis sáhttá guođđit Meahciráđđehussii fálaldaga 6.10.2025 dii 11 rádjái. Buot dárkilut dieđut gilvalahttimiin gávdnojit Hilma-vuogádagas (hankintailmoitukset.fi, suomagillii) ja Fálaldatbálvalusas (tarjouspalvelu.fi, suomagillii), gosa maiddái fálaldagat guđđojuvvojit.
Vánddardanjohtolagaid fuolahusas stáhta eatnamiin barget eanet fuolahusfitnodatdoallit go ovdal
Meahciráđđehusa Luonddubálvalusat ohcet dán jagi oktiibuot 54 guvlui fitnodatdoalli. Ulbmil lea geavahit vánddardančuozáhagaid boaldenmuorra-, bázahus- ja bajásdoallanfuolahusas oastinbálvalusaid eanet go ovdal. Fitnodatdoallit leat dikšon vánddardančuozáhagaid fuolahusa ovdalge guovlluin, mat gilvalahttojuvvojit dál, earret Kurjenrahka álbmotmeahcis. Doppe fuolahusbargguid leat ovdal dahkan Meahciráđđehusa iežas bargit ja fáŋggat.
Maŋimus giđđat Meahciráđđehusa Luonddubálvalusat ohce fitnodatdoalliid Lappi ja Nuorta-Suoma muhtin vánddardančuozáhagaide.
– Mii oaččuimet giđđat fálaldagaid buot vánddardančuozáhagaide, maidda ozaimet fitnodatdoalliid. Dát fitnodatdoallit leat dál válljejuvvon ja álggahit bargguideaset jagi 2026 álggus. Dušše Lappi Avviljoga vánddardančuozáhagaid gilvalahttin sirdašuvai giđas čakčii, háhkama sierraáššedovdi Olli Vainio Meahciráđđehusa Luonddubálvalusain dadjá.
Vuolggahuvvon fuolahusfitnodatohcu lea maŋimuš dán jagi. Dan maŋŋá Meahciráđđehusa buot vánddardančuozáhagain lea fuolahusfitnodat unnimustá boahtte jahkái.
Eará guovlluin, mat eai leat mielde dán jagi gilvalahttimiin, bosihanbáikkiid fuolahusat joatkašuvvet dáláš fuolahussoahpamušaiguin jagi 2026.
Dárkilut dieđut fuolahusvuloš vánddardančuozáhagain ja vánddardančuozáhagaid iešvuođain neahttasiidduin
Vuolggahuvvon gilvalahttimiid plánedettiin Meahciráđđehus lea mearridan, guđe bosihanbáikkiide čatnasit háhkat fuolahusa jagiide 2026 ja 2027. Gilvalahttimis leat dáid lassin opšuvdnan bosihanbáikkit, maid fuolahusas mearriduvvo easka maŋŋelabbos. Mearrádusat dáid bosihanbáikkiid bajásdoallamis dahkkojuvvojit ovdal go soahpamušbadji álgá. Dieđut iešguđet guovlluid mielde leat čohkkejuvvon neahttasiidui Vánddardanbálvalusaid vuoruheapmi. Varas dieđut bosihanbáikkiin ja eará čuozáhagain, mat fuolahuvvojit jagi 2026, gávdnojit Bajásdollojuvvon bosihanbáikkit -siiddus.
Siidduin gávdnojit maiddái daid vánddardančuozáhagaid iešvuođat, mat gilvalahttojuvvojit dál. Vánddardančuozáhaga iešvuođat govvidit, makkár bálvalusa dat galledeaddjiide vuosttaš sajis fállet ja man sullasaš bálvalanrusttegat leat dan mielde guovddážis ja dehálaččat.
Fáttá birra árabut dán jagi:
- 5.6.2025 Ođđa fuolahusfitnodagat dikšugohtet máŋggaid álbmotmehciid bosihanbáikkiid (suomagillii)
- 28.4.2025 Meahciráđđehus gilvalahttá vánddarančuozáhagaid fuolahusa Lappis ja Nuorta-Suomas
Lassidieđut mediai:
- Meahciráđđehusa fuolahusa gilvalahttimat ja vánddardanráhkadusaide čuohcci nuppástusat almmolaččat: buvttadanhoavda Inari Ylläsjärvi, tlf. 040 1581 760
- Iešguđet guovlluid vánddardančuozáhagat:
- Lappi: oktavuođahoavda Olli Lipponen, tlf. 040 738 4408
- Itä-Suomi: oktavuođahoavda Tiina Hakkarainen tlf. 040 767 3038
- Varsinais-Suomi: oktavuođahoavda Harri Karjalainen, tlf. 040 538 6346
- Šleađgapoasttat hámis: ovdanamma.sohkanamma@metsa.fi