Meahciráđđehus lea nannen ođđa guvllolaš dihtoeriid meahccejohtaluslobiide stáhta eatnamiin dihtoearrebadjái 2026–2028. Mearrádus guoská mohtorgielkámáđijaide, guovlluide, gos vudjet gielkkáin obbasis ja guovlluide dáid olggobealde.
Dihtoeriiguin figget dorvvastit luonddu, luondduealáhusaid ja báikkálaš servošiid ovdduid ja stivret meahccejohtolaga suvdilis vugiin. Meahciráđđehus ii evttot nuppástusaid lohpedihtoeriide boahttevaš badjái.
Guovddáš dihtoearit:
- Anár, Ohcejohka, Eanodat: Muohtaáigodagas eanemustá 6000 lobi/jahki ja bievlan eanemustá 1300 lobi/jahki.
- Golmma davimus gieldda máttabeale boazodoalloguovlu (Muoná, Gihttel, Soađegilli, Savukoski, Kolari, Pelkosenniemi, Salla, Posio, Kemijärvi Ranua, Roavvenjárga, Pello, Ylitornio, Tervola, Simo, Ii, Oulu, Pudasjärvi, Taivalkoski, Kuusamo, Suomussalmi, Hyrynsalmi, Puolanka ja Utajärvi): Muohtaáigodagas lobit mieđihuvvojit ákkastallojuvvon siva vuođul almmá lohkomeari badjerájá haga ja bievlan eanemustá 3500 lobi/jahki.
- Eará Suopma (earret ovdalis namuhuvvon guovllut): Muohtaáigodagas lobit mieđihuvvojit ákkastallojuvvon siva vuođul almmá lohkomeari badjerájá haga ja bievlan eanemustá 1500 lobi/jahki.
Dihtoearremearrádusa ákkastallamat
Meahccejohtaluslága mielde mohtorfievrruin ii prinsihpalaččat oaččo johtit luonddus almmá eananeaiggáda dahje hálddašeaddji lobi haga. Fievrru geavaheapmi ja dakko bokte lobi mieđiheapmi ii oaččo vahágahttit luonddu dahje eará birrasa, luondduealáhusaid, almmolaš virkkosmahttingeavahusa dahje eará almmolaš ovddu dahje priváhtta ovddu. Dáid eavttuid vuođul Meahciráđđehus mieđiha meahccejohtaluslobiid gielkámáđijaid, -luottaid ja oppasgielkáguovlluid olggobeallái dušše ákkastallojuvvon siva vuođul Meahciráđđehusa meahccejohtalusprinsihpaid mielde.
Bievlan johtolaga hehttehusat lundui leat stuoribut, nappo lobiid mieđiheamis leat eambbo ráddjehusat. Erenomážit sámiid ruovttuguovllus (Anár, Ohcejohka, Eanodat) dihtoearit leat dehálaččat dorvvastan dihtii boazodoalu ja kultuvrralaš rivttiid.
Meahciráđđehus čuovvu meahccejohtalusa váikkuhusaid ja sáhttá dárbbu mielde dárkkistit dihtoeriid dahje addit lasserávvagiid. Lohpegeavadagat ovddiduvvojit ovttasbarggus báikkálaš doaibmiiguin.
“Áššehasat sáhttet ohcat čuovvovaš dihtoearrebaji meahccejohtaluslobiid dan maŋŋel, go dihtoearremearrádus lea boahtán fápmui váidináiggi maŋŋel. Maiddái buot safári- ja reahkafievrredanfitnodagat galget ohcat ođđa dihtoearrebadjái eananeaiggáda miehtamiid ovddalgihtii, muittuha bálvalusoamasteaddji Elina Odé Meahciráđđehusa Luonddubálvalusain.
Mátkeealáhusfitnodagaid ohcamušaid vuostáiváldigohtet jagi 2025 čakčamánu rájes, ja daid sáhttá sáddet dihtoearrebaji loahpa rádjái eraluvat.fi-siiddu rávvagiid mielde. Iešheanalaš gielkávuoddjit sáhttet oastit luoddalobiid ođđa dihtoearrebadjái 1.1.2026 rájes eraluvat.fi-neahttagávppis.
Mearrádusa diehtunaddin
Dihtoearremearrádus dollojuvvo oaidnin láhkai 28.07.2025 rádjái Meahciráđđehusa áššehasbálvalanbáikkis Anáris, Inarintie 46, 99870 Anár ja Meahciráđđehusa Duottar-Sámi Luondduguovddážis, Peuratie 15, 99400 Eanodat ja Meahciráđđehusa neahttasiidduin čujuhusain www.metsa.fi ja www.eraluvat.fi.
Lassidieđut
- Elina Odé, meahccejohtalusa bálvalusoamasteaddji, Meahciráđđehusa Luonddubálvalusat elina.ode(at)metsa.fi, +358406328408 1.7. rádjái
- Olli Lipponen, oktavuođahoavda, Meahciráđđehusa Luonddubálvalusat, olli.lipponen(at)metsa.fi, +358407384408 9.7. rádjái.
- Loga eambbo meahccejohtalusas eraluvat.fi