Stáhta guovlluid meahccebivdogohcin beavttálmuvvá čakčat, go Lappii bálkáhuvvojit guokte ođđa meahccebivdogohcci. Dás duohko Meahciráđđehusas barget 13 fásta meahccebivdogohcci. Ođđa meahccebivdogohcciid rekryteregohtet geasseluopmobaji maŋŋá.
Meahciráđđehusa meahccebivdogohcin dárkkista jahkásaččat sullii 10 000 olbmo, geat johtet luonddus. Maŋimuš jagiid áigge luonddus johtin ja luondduturisma leat lassánan, mii lea lasihan deaddagiid lasihit maid meahccebivdogohcima.
“Lappi lea lunddolaš čuozáhat ođđa meahccebivdogohcciid bargoguovlun. Lappis leat buot eanemus stáhta hálddašan guovllut, daid geavaheapmi lea birra jagi máŋggabealat ja luondduturismma stuorrun lasiha bissovaš gohcima dárbbu”, bivdodoallojođiheaddji Vesa Ruusila dadjá.
Maiddái luondduealáhusaid ja lustageavahusa mearkkašupmi Lappis lea erenomáš stuoris. Dasa lassin viiddes meahcceguovllut ja álbmotmeahcit gáibidit buoret gohcinresurssaid. Gohcima čujuheapmái váikkuha láhka Meahciráđđehusa meahccebivdogohcimis, man ulbmil lea ovddidit stáhta guovlluid geavaheami legitimitehta.
“Guovtti fásta virggi bokte nannejuvvo Lappi gohcin ceavzilit. Seammás lasihuvvo luonddu geavaheapmái laktáseaddji duođalaš rihkkosiid gávnnahallanpotensiála ja nannejuvvo Meahciráđđehusa válmmasvuohta ovttasbargat virgeoapmahaččaiguin”, meahccebivdogohcinhoavda Henri Pelkonen gávnnaha.
Rekryteremat álggahuvvojit geasseluopmobaji maŋŋá. Meahccebivdogohcciid bargosajit ja doaibmaguovllut dárkkálmuvvet maŋŋelabbos.
Meahciráđđehusa meahccebivdogohcciin lea bolesa skuvlejupmi, ja sin doaibmaváldi meroštallojuvvo lágas. Meahccebivdogohccit koordinerejit meahccebivdogohcima guovlluineaset. Sis leat veahkkin earret eará meahcásteami ja guollebivddu bearráigeahččit eandalii sesoŋŋaid áigge.