Säʹmmlai tuõttvuõtt- da suåvâdvuõttkomissio luõvti lopprapoort 4.12.2025. Meäʹcchalltõs späʹssbââšš tuõttvuõtt- da suåvâdvuõttkomissio tuâjast säʹmmlai vuâkka da vuõiggâdvuõđid puõttlõsttum neeuʹrtummši čiõlǥtummšest, da lij vaalmâš juäʹtǩǩed tuâj õhttsažtuâj pueʹrummšen.
“Lij vääžnai, što histoorlaž pannsõõʹjid poʹhtte ouʹdde, što tõin vueiʹtte saǥstõõllâd äävas miõlin da suåppâd tååimain, koin säʹmmlai sââʹjj raʹvvje. Ååʹn parlamentaarlaž tuâjjäʹrttel arvvlâstt komissio siâzztõõzzid da plään juätkktååimid. Meäʹcchalltõs lij jiijjâs peäʹlnn vaalmâš staanâd tuâjjäʹrttel tuâj da oouʹdeed vuârrsärnnmõõžžid”, Meäʹcchalltõõzz pââimõs-šurr Juha S. Niemelä ceälkk.
Säʹmmlai dommvuuʹdest pâʹjjel 90 % lij Meäʹcchalltõõzz vaaldšummšest åårrai valdia määdd. Meäʹcchalltõõzz tuâjjan lij håiddad, ââʹnned da suejjeed vaaldšummšest åårrai luâttreeʹǧǧesvuõđid nuʹtt, što säʹmmlaž kulttuur harjjtem oudldõõzzid stääʹne. Säʹmmlai vuõiggâdvuõtt âʹlnn ââʹnned da õõudâsviikkâd jiijjâs ǩiõl da kulttuur oouʹdee suåppmõš- da saǥstõõllâm-mõõntõõllmõõžžin de stääʹne sääʹmǩiõllsaž saaggeem da kulttuurhaʹŋǩǩõõzzid.
“Õhttsažtuâj Meäʹcchalltõõzz da sääʹmõhttõõzz kõõskâst liâ õõudâsviikkâm looʹji eeʹjji poodd, da ânnʼjõõžž õhttsažtuâjjmõõntõõllmõõžž liâ samai katti da toiʹmmjeei. Vuârrsärnnmõš sääʹmõhttõõzz eeʹttǩivuiʹm lij čââvas. Meäʹcchalltõs ââʹn tän samai vääžnjõssân da ärvvsõʹžžen, da haaʹlad pueʹreed õhttsažtuâj õõudâs”, Niemelä ceälkk.
Meäʹcchalltõõzz tåimmʼmõõžž säʹmmlai dommvuuʹdest ohjjad vuuʹd luâttreeʹǧǧesvuõttplaan, kååʹtt lij rajjum õhttsažtuâjast sääʹmõhttõõzz da vuuʹd čõõnâsäʹrttlivuiʹm. Lââʹssen âânnmõõžžâst liâ jeeʹres õhttsažtuâjjsuåppmõõžž da YK biodiversiteeʹttisuåppmõʹšše vuâđđeei Akwé: Kon -tåimmam-maall mäddââʹnnem proseeʹssin.
Meäʹcchalltõõzz ij tuejjed säʹmmlai dommvuuʹdest meäʹcc-čuõppmõõžžid leʹbe jeeʹres meäʹcctäälltååimaid nõtta paalǥâskååʹdd priimmʼmõõžž. Luâttreeʹǧǧesvuõttplaanâst lij še linjjuum, što Meäʹcchalltõs ij oouʹdad vuuʹdest piõggviõkkhaʹŋǩǩõõzzid plaaneempââʹjest. Pukin mäddâânnmõʹšše kuulli plaanin saǥstâʹlle Sääʹmteeʹǧǧin da Saaʹmi siidsåbbrin. Meäʹcchalltõs reäšš taarbšeʹmmen sääʹmteʹǧǧlääʹjj 9 §:az puäʒʒhåiddamlääʹjj 53 §:za da sääʹmlääʹjj 56 §:za meâldlaid kuullmõõžžid.
Meäʹcchalltõõzz täävtõssân lij raʹvvjed jiijjâs tuâjjlai teâttmõõžž da fiʹttjummuš säʹmmlai kulttuurâst da vuõiggâdvuõđin, da tän diõtt tuâjjlaid liâ riâššâm škooultõõzz. Jeäʹrbõžžen säʹmmlai dommvuuʹdest leʹbe sääʹmaaʹššivuiʹm toiʹmmjeeʹjid äjšmâʹtte mättʼtõõttâd sääʹmǩiõl. Rekrytâsttmõõžžâst ääʹrvste sääʹmǩiõl da kulttuur silttummuš tuâjj meâldlânji. Tuõttääʹššest õõutverddsažvuõđ raʹvvjummšen vueiʹtte taarbšeʹmmen ââʹnned rekrytâʹsttemvueʹjiin še positiivlaž jeäʹrbužâânnmõõžž.
Lââʹssteâđaid: pââimõs-šurr Juha S. Niemelä, Meäʹcchalltõs, teʹl. 050 500 3681, etunimi.sukunimi@metsa.fi
