Metsähallitus Metsätalous Oy fitnodatjođiheaddjin ja Metsähallitus-konseartna stivrenjoavkku lahttun lea nammaduvvon Eanandoallo- ja vuovdediehtagiid magisttar, filosofiija doavttir, Karoliina Niemi.
Niemi sirdašuvvá bargui Metsäteollisuus ry vuovdejođiheaddji barggus, mas son lea doaibman jagi 2019 rájes. Ovdal Niemi lea bargan Metsäteollisuus ry:s EU-vuovdeáššiid hoavdan ja vuovdedoalloáššedovdin ja Eana- ja vuovdedoallobuvttadeaddjiid guovddášlihtus, Vuovdedutkanlágádusas ja eanan- ja vuovdedoalloministeriijas. Sus lea vuovdedikšu ja filosofiijadoaktára skuvlejupmi ja lassin son lea šaddoekofysiologiija doseanta.
Niemi álggaha barggustis Meahciráđđehusas 1.10.2025 ja vuostáiváldá fitnodatjođiheaddji barggu 1.1.2026.
Meahciráđđehusa vuollefitnodat Metsätalous Oy dikšu máŋggaatnuvuvddiid suvdilit ja buvttada ođasmuvvi vuođđoávdnasiid. Barggus heivehuvvojit oktii muorrabuvttadeami dárbbuid ja vuvddiid virkkosmahttinatnui, dálkkádatrievdama goahcamii, luonddu girjáivuhtii, boazodollui ja sámekultuvrii laktáseaddji mihttomeriid. Stáhta eananguovlluin vuovdedoallogeavahusas lea vádjit goalmmádas, sullii 2,75 miljovnna hektára, man lassin 0,44 miljovnna hektára lea ráddjejuvvon ekonomiijageavahusas. Metsätalous Oy jahkásaš gávpejohtu lea badjel 400 miljovdna euro ja fitnodaga bálvalusas barget sullii 400 olbmo.
“Karoliina dovdá viidát suopmelaš ja riikkaidgaskasaš vuovdesuorggi ja sus lea hárjánupmi máŋggabealagis čanasjoavkobarggus. Stáhta vuvddiid dikšumis ja Meahciráđđehusa strategiijas šaddet stuorát rollii ruoná lassáneami olis boahtteáiggis ain eanet luonddu girjáivuhtii ja dálkkádatrievdamii laktáseaddji hástalusat, maidda mii galgat nagodit vástidit seammás go heivehit oktii servodaga ja iešguđetlágan čanasjoavkkuid vuordámušaid. Lea illu sávvat Karoliina buresboahtin Meahciráđđehussii gaskkustit min dehálaš barggu luonddu árvvu ja oktasaš opmodaga ovddideami hárrái”, dadjá Meahciráđđehusa váldohoavda Juha S. Niemelä.
” Metsätalous Oy:s lea dehálaš rolla oktasaš vuvddiid dikšun ja geavaheaddjin ja suvdilis vuovdedoalu ovdavázzin. Mii vuordit ilus beassat bargat áššehasaiguin ja Meahciráđđehusa čeahpes bargoveagain ja fuolahit oktasaš vuovdeopmodagastamet”, dadjá Karoliina Niemi.
Metsähallitus Metsätalous Oy doaibmajođiheaddjin jagi 2016 rájes doaibman ráđđeolmmoš Jussi Kumpula sirdašuvvá ealáhahkii jagi 2025 loahpas. Kumpula lea bargan guhká Meahciráđđehusas iešguđet bargguin 1980-logu loahpa rájes.
“Háliidan juo dán muttus giitit Jussi lieggasit su erenomáš mávssolaš barggus Meahciráđđehusa ja olles suopmelaš vuovdesuorggi ovddideames”, Juha S. Niemelä dadjá.
Lassidieđut:
- Juha S. Niemelä, váldohoavdan, Meahciráđđehus, tlf. 050 500 3681
- Karoliina Niemi, tlf. 050 5679093