Meahciráđđehusa Luonddubálvalusat rahpá 1.12.2025 elektrovnnalaš ohcama Anára, Ohcejoga ja Eanodaga gieldda olbmuid meahccejohtaluslobiide 2026-2028. Dáid golmma davimus gieldda meahccejohtaluslobiid, dego maiddái buot earáge meahccejohtaluslobiid, sáhttá ohcat ollislaččat elektrovnnalaččat Eräluvat.fi-bálvalusas – beroškeahttá áiggis ja báikkis.
-Elektrovnnalaš áššiid dikšun Eräluvat.fis álkidahttá áššiid dikšuma eandalii davvin, gos leat guhkes mátkkit. Ohcamuša maŋŋá lohpi doaimmahuvvo ohcci šleađgapostii dakka viđe, meahccejohtalusa bálvaluseaiggát Elina Odé muitala.
Elektrovnnalaš áššiid dikšun gáibida nana Suomi.fi identitehta duođašteami. Jus elektrovnnalaš ohcan ii leat vejolaš, áššehasrávvejeaddji veahkeha lohpeohcamuša dahkamis Meahciráđđehusa bálvalanbáikkis Anáris ja Heahtás. Áššehasbálvalanbáikkis ohccojuvvon lohpi sáddejuvvo galledeami maŋŋá šleađgapoastan dahje poastta bokte.
Anára, Ohcejoga ja Eanodaga gieldda olbmuin lea vejolašvuohta ohcat muohttaga áigge lobi skohtervuodjimii iežas ruovttugielddas stáhta eatnamiidda. Lohpemearrádus vuoddji ruovttugildii lea álo nuvttá. Muohttaga áigge meahccejohtaluslobit mieđihuvvojit buohkaide gieldda olbmuide, geain lea dárbu lihkadit luonddus dálvit.
Gieldda olbmuid meahccejohtaluslobit eai atte lobi vuodjit álbmot- dahje luonddumeahcis
Nuvttá gieldda olbmuid muohttaga áigge meahccejohtaluslohpi ii atte lobi vuodjit álbmotmeahcis dahje luonddumeahcis. Jus gieldda olmmoš háliida vuodjit dáid guovlluin, son ferte ohcat dasa sierra lobi. Meahciráđđehus mieđiha lobi dušše earenoamáš dehálaš sivaid dihtii. Sierra lobi galgá ohcat maiddái bievlla áigge meahccejohtalussii buot guovlluin. Maiddái dáid sierra lobiid sáhttá ohcat Eräluvat.fi-bálvalusas.
Áiggi čuvvon kárttat ja lassedieđut hearkkes luondduguovlluin leat čujuhusas eraluvat.fi.
Lobi ohcanskovvi ja lassedieđut:
https://www.eraluvat.fi/se/cuozahagat/eanodaga-anara-ja-ohcejoga-baikki-olbmuid-meahccejohtaluslobit-563
Lassedieđut
- Meahciráđđehus, Luonddubálvalusat, maastoliikenneluvat@metsa.fi
- Media oktavuođaváldimat: Meahccejohtalusa bálvaluseaiggát Elina Odé, t. 040 632 8408, elina.ode@metsa.fi