Váldoluodda 21, mii ludde Giehtaruohttasa, lea Supmii dehálaš johtolat Davvi-Norgii ja Jiekŋameara hámmaniidda ja das lea stuora mearkkašupmi logistihkkii, fuolahussihkarvuhtii, turismii ja ealáhuseallimii Sámis. Davveossodagain luodda manná measta ollásit guovdu stáhta eatnamiid. Maiddái máŋggain eará Davvi-Sámi luottain dilli lea seammalágán – daid birastahttet stáhta eananviidodagat.
Go dáin davveguovllu luottain dehe šalddiin leat divvundárbbut, de Meahciráđđehus čilge gos lea lagamus vejolaš geađgeávdnasiid váldinbáiki ja bivdá bálgesiid ja vejolaččat ášši čanusjoavkkuin, dego Sámedikkis ja Sámi musea Siiddas, cealkámuša báikki rahpamis.
Geađgeávdnasiid stuorimus golloearri lea fievrredeapmi, nu ahte váldinbáikki livččii dehálaš gávdnat nu lahka go vejolaš geavahanbáikki. Geađgeávnnas ferte leat maid dárbahassii nanus, vai luottas šaddá gierdavaš iige dan dárbbaš dakkaviđe divvut. Kvaliteahttagáibádusat geađggi nanusvuhtii bohtet Väyläs.
Dát sáhttá doalvut dasa, ahte vejolaš váldinbáikkiid galgá dutkat eanet, goas Meahciráđđehus bivdá cealkámušaid juo ovdal potentiálalaš geađgeávnnasguovllu dutkama. Doppe gos geađgeávdnasa nanusvuohta lea doarvái buorre ja váldinbáiki oažžu soahpaduvvot eará doibmiiguin, ohccojuvvojit doaibmalobit geađgeávdnasiid ávkin atnimis báikkálaš lohpeeiseválddis.
– Viggat jearrat cealkámušaid álohii nu árrat go vejolaš. Cealkámuša ulbmilin lea oažžut midjiide lasi dieđu guovllus. Ožžojuvvon dieđuid vuođul geahččalit de soahpadit nu bures go vejolaš sierralágán dárbbuid – boazodoalu, kultuvrra, duovdaga ja luottadoallama, Meahciráđđehusa luondduriggodatáššedovdi Mikko Parviainen dadjá.
– Vuođđudit geađgeávdnasiid váldinbáikkiid Davvi-Sámis álohii dárbui, eat ovdamearkka dihte iežamet fitnodatdoaibmamet šaddadeami várás, Parviainen joatkka.
Potentiálalaččat geađgeávdnasiid váldinbáikkit leat Davvi-Sámis luonddudoalloguovllus, mii lea Meahciráđđehusa rehketdoallooasis dakkár guovlu, mas ii gáibiduvvo vuoitu, muhto dat ii leat goitge suodjaluvvon. Luonddudoalloguovllu seailun lea dehálaš, vai omd. geađgeávnnasfuolahus ja Bealuštanvuimmiid hárjehusat sáhttet ordnejuvvot Davvi-Sámis dás duohkoge.
– Dál ohcat geađgeávdnasiid ee. váldoluodda 21 vuođđodivvumii sihke Gáregasnjárgga šalddi ođasteapmái Ohcejogas. Ođđa šaldi lasiha johtolaga doaibmama ja dorvvolašvuođa go dat buhttet boares ja baskkes šalddi, mii lea geavahanagis loahpas, Parviainen muitala.
– Sávvat, ahte visot oassebealit jurddahivčče iežaset bealis, mot sáhtáleimmet buoremus vejolaš vuogi mielde ovddidit dáid servodatlaččat dehálaš prošeavttaid, Parviainen dadjá.
Lassidieđut
Luondduriggodatáššedovdi Mikko Parviainen, Meahciráđđehus, mikko.parviainen@metsa.fi, 040 620 8535