Sápmelaččaid duohtavuođa- ja soabadankomišuvdna geige loahpparaporttas 4.12.2025. Meahciráđđehus giitá komišuvnna árvvolaš ja historjjálaš barggu, mas dat čielggadii sápmelaččaid sajádahkii ja rivttiide guoskevaš loavkidemiid. Meahciráđđehus lea gárvvis joatkit barggu buoridit ovttasbarggu.
“Lea dehálaš, ahte sihke ovddeš ja dálá boasttuvuođat čalmmustahttojuvvojit, vai daid birra sáhttá ságastallat rabasvuođain ja soahpat doaimmain, maiguin sápmelaččaid sajádat nanosmahttojuvvo. Čuovvovaččat parlamentáralaš bargojoavku árvvoštallá komišuvnna ávžžuhusaid ja pláne joatkkadoaimmaid ovttas Sámedikkiin ja Saaʹmi siidsååbbarin. Maid Meahciráđđehus guorahallá komišuvnna ávžžuhusaid dárkilit ja lea bealistis gárvvis doarjut barggu ja ovddidit dialoga”, Meahciráđđehusa váldohoavda Juha S. Niemelä dadjá.
Sápmelaččaid ruovttuguovllus leat 90 % Meahciráđđehusa hálddašan stáhta eatnamat. Meahciráđđehusa doaibman lea dikšut, ávkkástallat ja suodjalit luondduváriid, maid hálddaša, dan láhkai, ahte sápmelaččaid kultuvrra hárjeheami eavttut dorvvastuvvojit. Ovddidat soahpamuš- ja ráđđádallanmeannudemiin sápmelaččaid rievtti bajásdoallat ja ovddidit iežas gielas ja kultuvrras. Dasa lassin doarjut gulahallama sámegillii ja kulturfidnuid.
”Ovttasbargu Meahciráđđehusa ja sámeservošiid gaskkas lea ovdánan jahkelogiid áigge, ja dálá geavadagat ovttasbargui leat oalle gokčevaččat ja doibmet bures. Dialoga sámeservoša ovddasteaddjiiguin lea lávga. Atnit dán hui dehálažžan ja árvvolažžan, ja háliidat buoridit ain ovttasbarggu”, Niemelä dadjá.
Luondduriggodatplána stivre Meahciráđđehusa doaimma sápmelaččaid ruovttuguovllus. Dat lea gárvvistuvvon sámeservoša ja guovllu čanusjoavkkuid ovttasbargguin. Lassin leat anus ovttasbargosoahpamušat ja eanageavaheami proseassain Akwé: Kon -doaibmamálle, man vuođđu lea ON:id biodiversitehtasoahpamušas.
Meahciráđđehus ii ollašuhte vuovdečuohppamiid dahje eará vuovdedoallodoaimmaid sápmelaččaid ruovttuguovllus almmá bálgosa miehtama haga. Luondduriggodatplánas lea maiddái linnjejuvvon, ahte Meahciráđđehus ii plánabaji áigge ovddit bieggafápmofidnuid. Buot eanageavaheapmái gullevaš plánain ráđđádallat Sámedikkiin ja nuortalaččaid siidačoahkkimiin. Meahciráđđehus ordne dárbbu mielde sámediggelága 9 §:s, boazodoallolága 53 §:s ja nuortalašlága 56 §:s oaivvilduvvonn gullamiid.
Meahciráđđehusa mihttomearrin lea nanosmahttit bargoveagas diđolašvuođa ja áddejumi sápmelaččaid kultuvrras ja rivttiin, ja dán várás bargovehkii leage ordnejuvvon skuvlejupmi. Movttiidahttit eandalii sápmelaččaid ruovttuguovllus dahje sámeáššiiguin bargan olbmuid oahpahallat sámegiela. Rekryteremis atnit árvvus sámegiela ja kultuvrra čehppodaga doaibmagovaid mielde. Albma ovttaveardásašvuođa sihkkarastin sáhttá rekryterendiliin gáibidit maiddái positiivva sierrameannudeami.
Lassedieđut: váldohoavda Juha S. Niemelä, Meahciráđđehus, t. 050 500 3681, ovdanamma.sohkanamma@metsa.fi
