Meahciráđđehus doarju doaimmaidis bokte mihttomeari, man mielde Suopma lea čitnaneutrála jagi 2035. Stáhta vuovddit leat mearkkašahtti čitnanjiellu ja čitnarádju, ja bieggafámu fidnoovddideami bokte ovddiduvvo ođasmuvvi energiija buvttadeapmi. Meahciráđđehusa ođđa dálkkádatprográmmas leat viidát doaibmabijut, maiguin nannejuvvojit positiivvalaš dálkkádatváikkuhusat, unnidit negatiivvalaš váikkuhusaid ja ovddiduvvo dálkkádatrievdamii vuogáiduvvan.
Meahciráđđehusa hálddašan guovllut leat dehálaččat dálkkádatrievdama goahcamis ja dasa vuogáiduvvamis.
“Dálkkádatprográmma bokte mii vuhtiiváldit dálkkádatváikkuhusaid ja dálkkádahkii laktáseaddji riskkaid ja vejolašvuođaid ain systemáhtalaččabut buot doaimmaineamet”, muitala Meahciráđđehusa váldohoavda Juha S. Niemelä.
Mii nannet vuvddiid čitnanjielu ja ovddidit ođasmuvvi energiija buvttadeami
Meahciráđđehusa strategiijalaš mihttomearrin lea lasihit stáhta máŋggaatnovuvddiid čitnanjieluid 10 proseanttain jagi 2035 rádjái ja stáhta eatnamiid muoraid čitnarájuid 10 proseanttain jagi 2030 rádjái jagi 2018 dási ektui.
Čitnarájuide guoski mihttomearri čavgejuvvui viđa jagiin ovddit dálkkádatprográmma ektui. Luondduriggodatguovddáža rehkenastimat, mat gárvánedje dán giđa, čájehit ahte stáhta vuovddit leat ain mearkkašahtti čitnanjiellu. Čitnarádju šaddá, vaikko njiellu leage unnon vuvddiid šaddama hiđásmuvvama ja dárkkálmuvvan rehkenastinmetodaid geažil.
“Mii nannet stáhta vuvddiid čitnanjieluid ja -rájuid viiddes doaibmabidjoollisvuođain. Doaibmabijuide gullet earret eará šaddanbáikái heivvolaš ja rievttesáigásaš vuovdedikšun, vuvddiid dukten, ovddosdikšojuvvon siepman- ja vesámateriála ávkkástallan ja dálkkádatmihttomeriid vuhtiiváldin čuollanplánain”, muitala Niemelä.
Meahciráđđehus lasiha positiivvalaš dálkkádatváikkuhusaidis ovddidemiin ođasmuvvi energiija buvttadeami stáhta eana- ja čáhceguovlluin.
“Mii joatkit bieggafámu fidnoovddideami ja láigohit stáhta guovlluid ođasmuvvi energiija fitnuide. Erenomážit mearrabieggafámu ovddideapmái čuhcet stuorra vuordámušat”, Niemelä muitala.
Mii geahpedit šaddovisteluoitimiid 20 proseanttain
Meahciráđđehusa mihttomearri lea geahpedit šaddovisteluoitimiid 20 proseantta jagi 2030 rádjái jagi 2024 dási ektui. Bargoveahka skuvlejuvvo vuhtiiváldit dálkkádatgeahččanguovlluid buot doaimmain ja mátkkošteamis oidojuvvojit johtinhámit, mat nuoskkidit uhcit. Meahciráđđehus luohpá váimmusdoaimma dáfus dárbbašmeahttun giddodagain ja gidde fuomášumi doaibmalanjaid geavahusa nuoskidemiide.
Meahciráđđehusa čitnaluottas stuorámus oassi šaddá muoraid rádjamis ja fievrredeamis. Muoraid rádjan- ja fievrredanbálvalusa háhkamiin oidojuvvojit mašiinnat, mat nuoskkidit uhcán ja dálkkádatprográmma doaibmabidjobajis Meahciráđđehus boahtá piloteret maid gálvvuid, mat doibmet elefámuin.
Mii ovddidit luonddu vuogáiduvvama dálkkádatrievdamii
Dálkkádatrievdan ja luonddu girjáivuohta laktásit nuppiidasaska. Dálkkádatrievdama goahcama lassin dálkkádatprográmmas leat doaibmabijut, maiguin ovddiduvvo luonddu vuogáiduvvan nuppástuvvi dálkkádahkii. Meahciráđđehus joatká luonddu girjáivuođa ovddideaddji aktiivvalaš ovddaldastin- ja luonddudikšundoaimmaid sihke suodjalanguovlluin ja máŋggaatnovuvddiin ja ovddida stáhta eatnamiid ekologalaš fierpmádaga. Dasa lassin fuolahit šlájaid suodjaleamis ja caggat vahátlaš vierisšlájaid.
“Mii dovdát lassin ođđa vejolašvuođaid luonddu girjáivuođa nannemis. Ovdamearkka dihtii buoridit piloterema bokte min válmmasvuođaid ávkkástallat luondduárvomárkaniid boahtteáiggis”, Niemelä muitala.
Ráhkkanit dálkkádatrievdama váikkuhusaide iežamet doaimmain
Dálkkádatprográmma lea viiddes ollisvuohta, man bokte Meahciráđđehus maid ovddaldastá ja ráhkkana nuppástuvvi dálkkádahkii ja dan váikkuhusaide iežas doaimmain.
“Mii ovddidit min doaimmaid ja ovddaldastit dálkkádatrievdama váikkuhusaid earret eará suodjalanguovlluid dikšumis, vuovdedoalu hárjeheamis ja stáhta eatnamiid lávvemis. Ovddidanbarggus ávkkástallojuvvojit ođđasamos dutkandieđut ja digitalisašuvnna vejolašvuođat”, Niemelä deattuha.
Lassidieđut:
- Váldočálli Juha S. Niemelä, tlf. 050 5003681
- Vásttolašvuođa njunuš áššedovdi Tiina Vuoristo, tlf. 040 5425365
- Gulahallanjođiheaddji Liina Aulin, tlf. 040 7709400
- Lassidieđut dálkkádatprográmmas