Meahccejohtaluslobit
Meahccejohtalussii dárbbaša álo eanaoamasteaddji lobi. Stáhtaeatnamiidda lobi addá Meahciráđđehus.
Meahccejohtalusain oaivvilduvvo mohtorfievrruiguin johtalus meahcis. Meahcci lea guovlu, gos eai leat mohtorfievrruide oaivvilduvvon geainnut dahje virggálaš mohtorgielkámáđijat.
Meahciráđđehus bajásdoallá mohtorgielkáluottaid. Luottat leat mávssolaš, eahpevirggálaš máđijat, maid geavaheapmi gáibida girjjálaš lobi. Báikkálaš olbmui lohpi lea nuvttá.
Mohtorgielkkáin vuodjima luoddalobit vuvdojuvvojit min bálvalusas Eräluvat.fi/maastoliikenne/moottorikelkkailu.
Meahccejohtalussii luottaid olggobeallái sáhttá addit lobi earenoamáš ákkain dáhpáhusa mielde. Báikkálaš ássái lohpi lea nuvttá. Luonddusuodjalanguovlluide eai addojuvvo meahccejohtaluslobit luottaid olggobeallái astoáigge ulbmiliidda.
Geassit meahccejohtalus lea váldonjuolggaduslaččat gildojuvvon hearkkes luonddu gollama dihtii, dasgo luottat oidnojit jagiid, juoba logijagiid áigge. Geasi meahccejohtalus lea lobálaš dušše earenomáš ákkain, ovdamearkka dihtii Davvi-Sámis boazodoallobargguin ja earáide ulbmiliidda.
Meahccejohtalus ja suodjalanguovllut
Meahccefievrojohtolat ii vástit luonddusuodjalanguovllu suodjalanulbmiliid, nuba dasa eai váldonjuolggaduslaččat addojuvvo lobit. Obanassii meahccejohtalusa ii goittotge sáhte suodjalanguovllusge garvit. Lobi ii dárbbaš virgeoapmahačča doaibmama, dego suodjalanguovllu fuolahusa, bearráigeahču, bolesdoaibmama ja rádjegoziheami dárbbuide, iige davvin boazodoalu dárbbuide.
Suodjalanguovlluin leat almmolaš geainnut, fanasfávllit sihke šleađga- ja telefonjohtasat, maid sáhttá bajásdoallat ráfáiduhttinnjuolggadusaid eastima haga. Fuolahusbarggus boahtán eanadat- ja riedjagivssiid ja meahccejohtalusa geahččaluvvo geahpedit figgamin ovttasbargui áššáiosolaš virgeoapmahaččaiguin ja lágádusaiguin. Suodjalanguovllu dikšuma ja fuolahusa dáfus dárbbašmeahttun geainnuid sáhttá giddet ja máhcahit luonddudillái.
Suodjalanguovllus vealtemeahttun fuolahus- ja eará johtalus figgojuvvo ráddjet dálveáigái vai vealtit eanadatvaháguvvamiid. Geasiáigásaš guollebivdui ja murjemii laktásan báikkálaš luondduealáhushárjeheddjiid meahccefievrojohtalus stivrejuvvo dihto luottaide. Boazodoalu gáibidan njealjejuvllagiin johtin lea lobálaš geassitge. Guovlluin gos meahccebivdu lea lobálaš, lea lohpi omd. bivdojuvvon fuođđoealli viežžan mohtorgielkkáin dahje njealjejuvllagiin. Turismaealáhussii laktásan ráddjejuvvon fuolahusfievrrideamit mohtorgielkkáin leat maiddái lobálaččat.
Aitosaš astoáigge mohtorgielkkáin vuodjin dahje eará meahccevuodjin ii leat suodjalanguovllus lobálaš. Spiehkastaga dahká davimus Sápmi, gos meahcceguovlluid ja luonddusuodjalanguovlluid viidodaga dihtii mohtorgielkáluottaid galgá sajuštit maiddái dáid guovlluid bokte. Dalle galgá vejolašvuođaid mielde geavahit juo leahkki, stáđásman luottaid, čázádagaid ja rabaseanadagaid, fápmojođasspáittuid jed. guovlluid ja juo lean geainnuid linnjáid.